وەزارەتی ناوخۆ: شوفێران لە ڕێگای ئەپڵیکەیشنێکەوە دەتوانن سەرپێچییەکانیان ببینن

ئاڤا نیوز

وەزارەتی ناوخۆی حکومەتی هەرێمی کوردستان، سزاکانی هاتووچۆی سەر ئۆتۆمبێلەکان لە ئەپڵیکەیشنی KRDPass تۆمار دەکات و شۆفێران بە ئاسانی وردەکاریی سزا داراییەکانی سەر ئۆتۆمبێل و سەرپێچییەکانیان دەبینن.

چیرۆکی سەرەکی: وەزارەتی ناوخۆی حکومەتی هەرێمی کوردستان، بڵاویکردووەتەوە، لە چوارچێوەی هەوڵەکان بۆ بە ئەلیکترۆنیکردنی خزمەتگوزارییەکان، خزمەتگوزاریی سزاکانی هاتووچۆ بە ئەلیکترۆنی دەکات. لەهەنگاوی یەکەمیشدا هەموو ئۆتۆمبێلەکانی تابلۆی هەولێر کۆدی 22 و سزاکانی خستە سەر ئەپڵیکەیشنی فەرمی حکومەت KRDPass، کە لە لایەن فەرمانگەی تەکنۆلۆژیای زانیاری پەرەپێدراوە.

لێدوانی فەرمی: هیوا ئەفەندی، سەرۆکی فەرمانگەی تەکنەلۆژیای زانیاری، بە ئاڤای ڕاگەیاند، ئەم خزمەتگوزارییە ئەلکترۆنییە ئەم هەفتەیە بۆ سنووری هەولێر کارا کراوە، هەفتەی ئایندە لە دهۆک کارا دەکرێت و پاشان لە سلێمانی و هەڵەبجە، وتی "ئەپلیکەیشنەکە پێشکەوتووە و لە ڕووی تەکنییەوە هیچ کێشەیەکی نییە، تا ئێستا نزیکەی نیوملیۆن کەس دایبەزاندووە."

سەرۆکی فەرمانگەی تەکنەلۆژیای زانیاری وتیشی: لە ئایندەدا بۆ ئاسانکاریی شۆفێران پەرەی زیاتر بە بەرنامەکە دەدرێت، چەندین خزمەتگوزاریی دیکەی بۆ زیاد دەکرێت.

٠ شۆفێر چیدیکە پێویست ناکات مۆڵەتی شۆفری لەگەڵ خۆی هەڵگرێت، بەڵکو کۆپییەکی مۆڵەتی شۆفێری لەناو بەرنامەدا دادەبەزێنێت و دەتوانێت کاری خۆی پێ بکات. 

٠ لە ئایندەدا شوفێر دەتوانێت هەر لەو ڕێگایەوە سزا داراییەکان بە ئەلیکترۆنی پاکتاو بکات.

زانیاریی زیاتر: بۆ ئەوەی سزای سەرپێچییەکانی هاتووچۆی خۆت ببینیت، پێویستە وەشانی نوێی ئەپڵیکەیشنی krdpass دابەزێنێ و پاشان لە بەشی خزمەتگوزاریی بژاردەی ئۆتۆمبێلەکانم زیاد دەبێت. لەو بەشە داتاکانی ئۆتۆمبێلەکەت زیاد بکە و هەر سەرپێچییەکی هاتوچۆ بکەیت لەو بەشە زیاد دەکرێت.

ئەمەش بزانە: وەزارەتی ناوخۆ، ئەم خزمەتگوزارییەی زیادکردووە تا  شوفێر سزاکانی خۆی ببینی و خۆی لە سەرپێچی زیاتر بپارێزێت.