چوارچێوەی هەماهەنگی بۆ ئاڤا: مالیکی بە فەرمی وەک کاندیدی سەرۆکوەزیران ڕادەگەیێنرێت

ئاڤا نیوز

ئەندامێکی هاوپەیمانی چوارچێوەی هەماهەنگی شیعەکان ئاشکرای کرد، ئەمشەو بە فەرمی نووری مالیکی، سەرۆکی هاوپەیمانی دەوڵەتی یاسا وەک کاندیدی چوارچێوەی هەماهەنگی بۆ پۆستی سەرۆکوەزیران دەستنیشان دەکرێت.

چیرۆکی سەرەکی: بڕیارە ئەمشەو ئەندامانی هاوپەیمانی چوارچێوەی هەماهەنگی بە مەبەستی دیاریکردنی ناوی سەرۆکوەزیرانی نوێی عێراق لە ماڵی هادی عامری کۆبونەوەیەکی گرنگ بکەن.

لێدوانی فەرمی: د. عەلی دفاعی، ئەندامی مەکتەبی سیاسی ئەنجوومەنی باڵای ئیسلامی کە هومام حەمودی سەرۆکایەتی دەکات، بە ئاڤای راگەیاند، بڕیارە ئەمشەو چوارچێوەی هەماهەنگی لە ماڵی هادی عامری، ئەمینداری گشتیی رێکخراوی بەدر کۆببێتەوە و تێیدا نووری مالیکی سەرۆکی هاوپەیمانی دەوڵەتی یاسا وەک کاندیدی فەرمی بۆ پۆستی سەرۆکوەزیران دەناسێنرێت.

لەلایەکی دیکەوە: پێشتر ئەبو میساق مەساری، ئەندامی مەکتەبی سیاسی ڕێکخراوی بەدر بۆ ئاڤای ئاشکرا کردبوو، ئەگەر لایەنەکان بگەنە ڕێککەوتن، ئەو کاتە کۆبوونەوەی چوارچێوەی هەماهەنگی دەکرێت.