لە سووریا گرووپی "چەتە و ڕێگر" پەیدابوون دەستدرێژی دەکەنە سەر ئاوارە کوردەکان

ئاڤا نیوز

بەهۆی ئەو بارودۆخە ناهەموارەی بەسەر ڕۆژئاوای کوردستان هاتووە، دیاردەیەکی مەترسیدار سەریهەڵداوە، ئەویش دروستبوونی گرووپی چەتەیە، ئەم گرووپانە ڕێگری لە خێزانە ئاوارەکان دەکەن و تەواوی پارە و کەلوپەلەکانیان لێ وەردەگرن.

زانیاریی بەدەستهاتوو: بەپێی زانیارییەکان، تا ئێستا زیاتر لە 100 خێزان لەلایەن ئەم چەتانەوە تاڵان کراون. هەندێک لەو خێزانانە ئاماژەیان بەوە کردووە، چەتەکان هەموو شتێکیان لێ سەندوون و تەنیا جلوبەرگی بەریان بۆ ماوەتەوە.

لێدوانی فەرمی: کامەران عوسمان، ئەندامی تیمی کوردستانی عێراقی ڕێکخراوی سی پی تی ئەمریکی کە ئێستا لە ڕۆژئاوای کوردستانە، بە ئاڤای وت، گرووپە چەتە چەکدارەکان لە ڕێگا چۆڵەکاندا بۆسە بۆ ئەو خێزانە کوردانە دادەنێن کە لە شارێکەوە بۆ شارێکی دیکە ئاوارە دەبن.

ئاماژەی بەوەشکرد، ئەم گرووپانە چەکیان پێیە و کەس نازانێت سەر بە کێن، خەڵکانێکن جگە لە ڕاوڕووت و تاڵانی هیچی دیکە نازانن و هەرچی پارە، ئۆتۆمبێل، مۆبایل و کەلوپەلی بەنرخی ئاوارەکانە دەیدزن و دواتر لە چۆڵەوانییەکاندا جێیان دەهێڵن.

زانیاریی زیاتر: دۆخەکە تەنیا خەڵکی سڤیلی نەگرتووەتەوە، بەڵکو بارەگای هەشت ڕێکخراوی ناوخۆیی چۆڵکراون و بەشێکیان تاڵان کراون، چەندین کارمەندی ڕێکخراوەکانی وەک "ڕامکۆ" و "مانگی سووری کوردی" ڕفێنراون و چارەنووسیان نادیارە. هاوکات بەهۆی مەترسی گرووپەکانی سەر بە حکومەتی سووریا، ڕێکخراوە بیانییەکانیش ناوچەکەیان جێهێشتووە.