نووری مالیکی بەفەرمی بۆ پۆستی سەرۆکوەزیران کاندید کرا

ئاڤا نیوز

سەرکردەکانی چوارچێوەی هەماهەنگی ئەمشەو کۆبوونەوە و بە فەرمی نووری مالیکی، سەرۆکی هاوپەیمانی دەوڵەتی یاسایان وەک کاندیدی سەرۆکوەزیرانی عێراق بۆ چوار ساڵ داهاتوو دیاریکرد، هۆکارەکەشیان بۆ ئەزموونی سیاسی و کارگێریی و ڕۆڵی دیاری ناوبراو لە بەڕێوەبردنی دەوڵەتدا گەڕاندەوە.

ڕاگەیێنراوی فەرمی: چوارچێوەی هەماهەنگی لە ڕاگەیێنراوێکدا ڕایگەیاند، ئەمشەو سەرکردەکانی چوارچێوەی هەماهەنگی لە ماڵی هادی عامری، ئەمینداری ڕێکخراوی بەدر کۆبوونەوە و دوای گفتوگۆی قووڵ و بە "زۆرینەی دەنگ"، بڕیاردرا نووری مالیکی وەک کاندیدی گەورەترین فراکسیۆنی پەرلەمانی عێراق، بۆ پۆستی سەرۆکوەزیران دیاریی بکرێت.

ئاماژەی بەوەشکرد، هۆکاری ئەم بڕیارە بۆ ئەوە دەگەڕێتەوە مالیکی لەبواری سیاسی و کارگێڕیدا خاوەن ئەزموونە و لە بەڕێوەبردنی دەوڵەتیشدا ڕۆڵی هەیە، چوارچێوەی هەماهەنگی جەختیش لە پابەندبوونی بە ئاراستەی دەستووریی و کارکردن لەگەڵ هەموو هێزە نیشتیمانییەکان دەکاتەوە بۆ پێکهێنانی حکومەتێکی بەهێز و کارا، بەجۆرێک بتوانێت ڕووبەڕووی ئاستەنگییەکان ببێتەوە، خزمەتگوزاری پێشکەش بکات و یەکێتی و ئاسایشی عێراقیش بپارێزێت.

لەلایەکی دیکەوە: لەبارەی پۆستی سەرۆککۆماری عێراق، سەرکردەکانی چوارچێوەی هەماهەنگی داوایان لە پەرلەمان کرد لە وادەی دەستووریی دیاریکراودا (کە دەکاتە کۆتایی ئەم هەفتەیە) کۆبوونەوەی هەڵبژاردنی سەرۆککۆمار بکرێت.