نهێنی پشت هەڵگەڕانەوەی هۆزە عەرەبییەکان لە هەسەدە ئاشكرا دەبێت

ئاڤا نیوز

کشانەوەی کتوپڕی هێزەکانی هەسەدە لە شارەکانی ڕەقە، تەبقە و دێرەزوور پەردەی لەسەر خیانەتێکی گەورەی هۆزە عەرەبە سونییەکان لادا، ڕاپۆرتە جیهانییەکان باس لەوە دەکەن چەندین لایەن و کەسایەتی کاریان لەسەر کڕینی سەرۆک هۆزەکان کردووە بۆ ئەوەی لە هەسەدە هەڵگەڕێنەوە.

چیرۆکی سەرەکی: کشانەوەی خێرای هەسەدە لە شارەکانی ڕەقە، تەبقە و دێرەزوور هەموو لایەکی تووشی شۆک کرد. هەرچەندە مەزڵووم عەبدی دەڵێت هۆکاری کشانەوەکە بۆ ڕێگری لە ڕژانی خوێنی زیاتر بووە، بەڵام زانیارییەکان ئاماژە بەوە دەکەن کە چەکدارانی هۆزە عەرەبە سونییەکان لەناو هەسەدە خیانەتیان کردووە و چوونەتە پاڵ گرووپە چەکدارەکانی دیکەی سووریا. ئەمەش لە کاتێکدایە پێشتر لە هەرێمی کوردستانەوە هۆشداری درابوو بە هەسەدە کە دەزگا هەواڵگریەکانی وڵاتان بەنیازن ئەو چەکدارانە بکڕن.

هۆشدارییەکە لەجێی خۆی بوو، ئەو چەکدارانە خیانەتیان لە هەسەدە کردوو چوونە پاڵ گرووپە چەکدارەکانی سووریا، چوونکە شارەکانی ڕەقەو تەبقەو دێرەزوور لەلایەن سوپای سووریاوە کۆنترۆڵ نەکرا، چەکداری ئەو هۆزە عەرەبیانە کۆنترۆڵیان کردن، کە لەناو هەسەدا بوون و چەند ساڵێکە هەسەدە بەرگریان لێ دەکات و دەیانپارێزێت لە داعش و ملیشیا شیعییەکانی سەر بە بەشار ئەسەد.

زانیاریی بەدەستهاتوو: بەپێی ڕاپۆرتێکی ڕۆژنامەی "وۆڵ ستریت جۆرناڵ"ـی ئەمریکی، ئەحمەد شەرع کەسێکی بەناوی جیهاد عیسا شێخ (ئەبو ئەحمەد زاکور) ڕاسپاردووە بۆ ڕازیکردنی سەرۆک هۆزەکان تا واز لە هەسەدە بهێنن و پشتیوانی حکومەت بکەن. هاوکات بەڕێوەبەری هەواڵگری سووریا و ئەسعەد شەیبانی، وەزیری دەرەوەش کە خۆیان خەڵکی شارەکانی رۆژهەڵاتی سووریان ژێر بەژێر پەیوەندییان درووست کردووە لەگەڵ سەرۆک هۆزەکانی ئەو شارانە و پەشیمانیان کردوونەتەوە لە پشتیوانی لە هەسەدە.

زانیاریی زیاتر: بەپێی ڕاپۆرتەکە، ئێستا ئەحمەد شەرع لەبەردەم تەحەدایەکی گەورەدایە بۆ کۆنترۆڵکردنی ئەم گرووپە چەکدارانە تاوەکو قەتڵوعام نەکەن. هاوکات ئاشکرای کردووە مەزڵووم عەبدی ڕازی بووە هەسەدە تێکەڵی سوپای سووریا بکات بە مەرجی مانەوەی بەڕێوەبەرایەتی خۆسەر، بەڵام ئەحمەد شەرع بە تەکتیکێکی سەربازی کۆتایی بەو داواکارییانە هێناوە.