لە چەند ناوچەیەک پشووی فەرمی ڕاگەیێنرا

ئاڤا نیوز

بەهۆی سەرما، بەستەڵەک و بەفربارین لە چەند شوێنێکی هەرێمی کوردستان کرایە پشوو، هاوکات لە هەندێک ناوچەش دەوام کردن ئاساییە، ئاڤا میدیا دوایین زانیاری لەبارەی پشوو فەرمییەکان بڵاودەکاتەوە.

چیرۆکی سەرەکی: چەند ڕۆژێکە بەهۆی سەرما و بەفربارینەوە لە چەندین ناوچەی جیاوازی هەرێمی کوردستان پشووی فەرمی ڕاگەیێنراوە، ئەمڕۆ، لە هەندێک شوێن پشووە و لە هەندێک شوێنیش دەوام کردن ئاساییە.

لێدوانە فەرمییەکان: ئاڤا لەبارەی پشوو قسەی لەگەڵ بەڕێوەبەری گشتیی پەروەردەی ڕاپەڕین و چەند شوێنێکی دیکە کردووە:

٠ محەممەد کەریم، بەڕێوەبەری گشتیی پەروەردەی ئیدارەی ڕاپەڕین: ئەمشەو پەیوەندی بە بەڕێوەبەری پەروەردەکانی سنوورەکەمان دەکەین، دەسەڵاتی ئەوەیان پێ دەدەین لە گوندە دوورە دەستەکان، ئەوانەی بەفری زۆریان لێ باریوە و ڕێگای هاتووچۆ گیراوە بیکەن بە پشوو. بەڵام لە سەنتەری ڕانیە و قەزا و ناحییەکان ئەوانەی کەشوهەوا ئاساییە دەوام دەکرێت و نابێت بە پشوو. دەوامی سەرجەم ناوەندەکانی خوێندن لە سنووری ناحیەی ناڵپارێز و گوندەکانی ئاسایییە. 

٠ ئەسعەد جافر، بەڕێوەبەری پەروەردەی پێنجوێن: لە گوندەکانی دەوروبەری پێنجوێن و ناحیەی گەرمک و سەرجەم گوندەکانی دەوروبەریان، دەسەڵاتمان داوە بە بەڕێوەبەری قوتابخانەکان سەرپشک بن بۆ دەوامی سبەینێ بڕیاربدەن بیکەن بە پشوو یان نا.

٠ هەژار حەکیم، بەپرسی ڕاگەیاندنی ئیدارەی سەربەخۆی سۆران: ئەمشەو کاتژمیر نۆ بڕیار دەدەین لە کوێ بکرێتە پشوو و لە کوێ نەکرێتە پشوو. ئەم سنوورە سەنتەری سۆران، ڕواندز، چۆمان، سیدەکان، مێرگەسۆر و خەلیفان دەگرێتەوە.

٠ ئەحمەد حەسەن، بەڕێوەبەری پەروەردەی چۆمان: لە سنووری ناحیەی حاجی ئۆمەران بەفرێکی زۆر باریوە، دەسەڵاتمان داوە بە بەڕێوەبەری قوتابخانەکان سەرپشک بن لە ڕاگەیاندنی پشوو.

٠ مەجید خانۆ، بەڕێوەبەری پەروەردەی مێرگەسۆر: تا ئێستا پشوو ڕانەگیێنراوە و دەوام ئاساییە.

٠ کاروان زاهیر، بەڕێوەبەری پەروەردەی ئاکرێ: لە ئاکرێ و  بەردەڕەش دەوام هەیە و ئاساییە.

٠ سۆران عومەر، بەڕێوەبەری گشتی پەروەردەی هەڵەبجە: سبەی لە سنوورەکە دەوامی قوتابخانەکان ئاساییە.

لەلایەکی دیکەوە: عوبێد ڕەشاڤایی، بەرپرسی نووسینگەی ئاڤا لە دهۆک وتی: تا ئێستا لە هیچ شوێنێکی دهۆک نەکراوەتەوە پشوو، لە سنووری دهۆک بەپێی بەدواداچوونی پەیامنێری ئاڤا دەوام ئاساییە و پشوو نیییە.