شەپۆلێکی دیکەی بەفربارین هەرێمی کوردستان دەگرێتەوە

ئاڤا نیوز

بەپێی پێشبینییەکان، ئەمشەو شەپۆلێکی دیکەی بەفربارین هەرێمی کوردستانی دەگرێتەوە، پێشبینی دەکرێت سەنتەری شارەکان بگرێتەوە و پلەکانی گەرمای بۆ ژێر سفری پلەی سیلیزی دادەبەزێت.

لێدوانی فەرمی: شێخ دارا، شارەزا و پێشکەشکاری کەشوهەوای ئاڤا ڕایگەیاند: سبەی هەینی شەپۆلێکی دیکەی بەفر بارین سەرتاسەری هەرێمی کوردستان دەگرێتەوە بە ڕێژەی جیاواز، پیشبینی دەکرێت سەنتەری شارەکانی سلێمانی، هەولێر، کەرکووک، ڕانیە، پشدەر، شارباژێڕ، پێنجوێن و هەڵەبجە و دەوروبەری بگرێتەوە.

شێخ دارا، هۆشداری دەداتە شۆفێران پابەندی ڕێنماییەکانی هاتووچۆ بن، چونکە شەختە و بەند و تەمومژ لە ڕێگا سەرەکییەکانی نێوان شارەکانی هەرێمی کوردستان دروست دەبێت. وتیشی تا کۆتایی ئەم مانگەش دوو شەپۆلی باران ڕوو لە هەرێمی کوردستان دەکەن.

لەلایەکی دیکەوە: بەڕێوەربەرایەتیی گشتیی کەشناسی و بوومەلەرزەزانی هەرێمی كوردستان بڵاوی کردەوە ، ئەمشەو کاریگەریی بارستە هەوایەکی ساردی جەمسەری ڕوو لە هەرێمی کوردستان دەکات، لە زۆرینەی ناوچەکان بەفر دەبارێت.

هەر بەپێی پێشبینییەکانی کەشناسی هەرێمی كوردستان، لە ڕۆژی هەینیدا بەفر لە سەنتەری پارێزگاکان دەبارێت بەڕێژەی جیاجیا، کاریگەریی ئەم شەپۆڵە تا کاتەکانی درەنگی شەوی هەینی و کاتەکانی بەرەبەیانی ڕۆژی شەممە بەردەوام دەبێت و لە ڕۆژی شەممە کاریگەری ئەم شەپۆڵە کۆتایی دێت.

زانیاریی زیاتر: کەشناسی هەرێمی كوردستان نزمترین پلەی گەرمای تۆمارکراوی چەند ناوچەیەکی هەرێمی کوردستانی بەم شێوەیە دیار یکردووە:

هەولێر، 1- پلە
سلێمانی، 3- پلە
هەڵەبجە، 3- پلە
دهۆک، 1- پلە
ئیدارەی سەربەخۆی زاخۆ، 1- پلە
ئیدارەی سەربەخۆی سۆران، 6- پلە
ئیدارەی سەربەخۆی گەرمیان، 1- پلە
حاجی ئۆمەران، 11- پلە