سەرمایەکی سەخت ڕۆژهەڵاتی کوردستانی گرتووەتەوە؛ بۆ کەم بەکارهێنانی غاز پشوو ڕاگەیێنراوە

ئاڤا نیوز

 

چەند ڕۆژێکە بارستە هەوایەکی سارد و شەپۆلێکی بەفربارین ڕووی لە شارەکانی ڕۆژهەڵاتی کوردستان کردووە کە بەهۆیە پشوو لە زانکۆ و خوێندنگە و فەرمانگە حکومییەکانی ڕاگەیێنراوە. کەشناسی دەڵێت: ئەم دوو ڕۆژە پلەی گەرما زیاتر لە 10 پلە ژێر سفر دادەبەزێت.

 

لێدوانی فەرمی: بەڕێوەبەرایەتیی کۆنترۆڵی قەیرانی پارێزگای سنە ڕایگەیاند: بەهۆی دابەزینی پلەی گەرما و بە مەبەستی کەمکردنەوەی بەکارهێنانی سووتەمەنی، سەرجەم دامەزراوە حکومییەکان، بانکەکان، قوتابخانە و زانکۆکان دادەخرێن بەڵام دامەزراوە فریاگوزارییەکان و فریاکەوتنی خێرا و بنکە تەندرووستییەکان ناگرێتەوە.

- هەر بەهۆی دابەزینی پلەکانی گەرما و گەیشتنە پلەی بەستن و شەختە کۆنترۆڵی قەیرانی پارێزگای ورمێ بڕیاری دا ڕۆژی چوارشەممە سەرجەم قوتابخانە، زانکۆ و پەیمانگە و دامەزراوە حکومیەکان و بانکەکان دابخرێن، ئەوەش بە مەبەستی کەم بەکارهێنانی گاز و وزە.

- لە پارێزگای کرماشانیش، بە مەبەستی کەم بەکارهێنانی گاز و وزە، لە پەیمانگە و قوتابخانەکان دەبێتە پشوو و لە دامەزراوە حکومیەکان و بانکەکانیش دوو کاژێر درەنگتر دەست بە کارکردن دەکرێت.

- هەر بەهۆی سەرما و دابەزینی پلەی گەرماوە کۆنترۆڵی قەیرانی پارێزگای ئیلام بڕیاریدا رۆژی چوارشەممە قوتابخانە، زانکۆ و پەیمانگەکان بکرێنە پشوو و دەوام لە دامەزراوە حکومییەکان و بانکەکان دوو کاژێر درەنگتر دەست پێبکات.

ئەوەی پێویستە بیزانیت: بەهۆی سەرما و کەمکردنەوەی بەکارهێنانی گاز و وزەوە بڕیاری پشوو ڕاگەیێنراوە لە شارەکانی ڕۆژهەڵاتی کوردستان، ئەم سەرمایەی ڕۆژهەڵاتی کوردستانی گرتووەتەوە بە بێوێنە وەسف دەکرێت کە دەیان ساڵە بەو ڕادەیە نەبووە.