لە ترسی هاتنی داعش عێراق سنوورەکانی لەگەڵ سووریا بۆ زیاتر لە 600 کیلۆمەتر درێژ دەکاتەوە

ئاڤا نیوز

لە چوارچێوەی بەسەرکردنەوەیەکی مەیدانی بۆ ناوچە سنوورییەکانی نێوان عێراق و سووریا، محەممەد شیاع سوودانی، سەرۆکوەزیران و فەرماندەی گشتیی هێزە چەکدارەکانی عێراق و عەبدولئەمیر شەممەری، وەزیری ناوخۆ، زنجیرەیەک کۆبوونەوەی فراوانیان لەگەڵ فەرماندە ئەمنییەکان و دەزگا هەواڵگرییەکان ئەنجامدا.

 

وێنە گەورەکە: بەهۆی شەڕ و ئاڵۆزییەکانی دوو هەفتەی ڕابردووی سووریا، حکومەتی عێراق سنوورەکانی لەگەڵ ئەو وڵاتە بە سیستەمی چاودێری ورد و پێشکەوتوو  تووندوتۆڵتر دەکات و سەرۆکوەزیرانی عێراق، سەردانی سنوورەکان دەکات. 

ڕاگەیێنراوی فەرمی: نووسینگەی سەرۆکوەزیرانی عێراق، لە ڕاگەیێنراوێکدا، ئاماژەی بەوەداوە لە کۆبوونەوەکاندا، بە وردی ئاستی هەماهەنگی نێوان هێزەکانی پاسەوانی سنوور، سوپای عێراق و حەشدی شەعبی تاوتوێ کرا و جەختیش لە پێویستی پڕکردنەوەی هەر کەلێنێکی ئەمنی و چارەسەرکردنی خێرای ئاستەنگە مەیدانییەکان کرا.

نووسینگەی سەرۆکوەزیرانی عێراق دەشڵێت: "بە ئامانجی ڕێگریکردن لە هەر دزەپێکردنێک یان هەڕەشەیەکی تیرۆریستان چارەسەری خێرا و دەدۆزنەوە."

زانیاریی زیاتر: ئەم جووڵەیەی فەرماندەی گشتی هێزە چەکدارەکان، لە کاتێکی زۆر هەستیاردا دێت، ئەویش بەهۆی دۆخی ئەمنی سووریایە، شەڕی نێوان چەکدارەکانی سووریا و هەسەدە، وایکردووە حکومەتی عێراق  لە ڕێگەی ئەم ڕێکارانەوە تەواوی سنوورەکانی لەگەڵ سووریا بەدرێژایی زیاتر لە 600 کیلۆمەتر درێژ بکاتەوە، بیکات بە چەند ناوچەیەکی سەربازیی قەدەغەکراو.

بۆچی گرنگە: لەگەڵ هەموو گۆڕانکاریی و پێشهاتێک لە سووریا، عێراق ترسی ئەمنیی بۆ دروست  بووە و جارێکی دیکە پێداچوونەوە بە پلانی پاراستنی سنوورەکاندا دەکاتەوە، هۆکارەکەشی بۆ پەیوەندی دوودڵی بەغدا لەگەڵ دەسەڵاتی نوێی دیمەشق دەگەڕێتەوە، کە پەیوەندییەکە زیاتر ئەمنیی و هەواڵگرییە، لە بوارەکانی تری هەماهەنگی نەگوازراوەتەوە.