ئاڤای خەڵک؛ پێنج گەڕەکی ڕانیە بێ خزمەتگوزارین

ئاڤا نیوز

بەهۆی تەواونەکردنی پڕۆژەی قیرکردنی کۆڵانەکانیان، دانیشتووانی پێنج گەڕەکی شاری ڕانیە نیگەرانن و دەڵێن لە وەرزی زستاندا ڕووبەڕووی گرفتی قوڕ و لیتە بوونەتەوە.

چیرۆکی سەرەکی: ساڵی ڕابردوو بڕیاری قیرکردنی گەڕەکەکانی (ئاشتی، ماردین، ئەندازیاران، ڕووناکی و شادی) لە ڕانیە دەرچوو. بۆ ئەم مەبەستە بڕی دوو ملیار دینار تەرخان کرا و لەگەڵ کۆمپانیایەک گرێبەست واژۆ کرا بۆ ئەوەی پڕۆژەکە لە ماوەی 500 ڕۆژدا تەواو بکات.

سەرەڕای ئەوەی کار لە بەشێکی گەڕەکەکاندا کراوە، بەڵام لە ئێستادا پڕۆژەکە وەستاوە و تەنیا 30%ـی کارەکانی جێبەجێ کراوە. دانیشتووانی ئەو گەڕەکانە دەڵێن بەهۆی تەواونەکردنی کارەکان و هاتنی وەرزی زستان، کۆڵانەکانیان پڕ بووە لە چاڵوچۆڵ و قوڕ و لیتە.

لێدوانی فەرمی: ئەحمەد مەلا مووسا، سەرۆکی شارەوانی ڕانیە سەبارەت بە هۆکاری پەککەوتنی پڕۆژەکە بە ئاڤای ڕاگەیاند: "بە دوو هۆکار کۆمپانیا کارەکانی ڕاگرتووە، یەکەمیان لەبەر زستان و سەرماوسۆڵە، لە لایەکی دیکەش کۆمپانیا داوای سولفەی کردووە، بەڵام لەبەر قەیرانی دارایی نەتوانراوە بۆی خەرج بکرێت."

سەرۆکی شارەوانی ئاماژەی بەوەش کرد، هەوڵدەدەین کارکردن لە پڕۆژەکە دەستپێبکاتەوە، بەڵام چاوەڕوانی ئاسایی بوونەوەی کەشوهەوا دەکەن.