ئەمریکا بۆ حکومەتی سووریا: لەگەڵ هەسەدە پابەندی ئاگربەست بن

ئاڤا نیوز

براد کووپەر فەرماندەی فەرماندەیی ناوەندی ئەمریکا (سێنتکۆم) و ئەحمەد شەرع، سەرۆکی سووریا، بە تەلەفۆن قسەیان کرد، فەرماندەی فەرماندەیی ناوەندی ئەمریکا داوا لە حکومەتی سووریا دەکات پابەندی ئاگربەست بێت لەگەڵ هەسەدە.

چیرۆکی سەرەکی: براد کووپەر و ئەحمەد شەرع، لەو پەیوەندییە تەلەفۆنە، تاوتوێی دۆخی سووریا، پرسی دەستگیرکراوانی داعش، ئاگربەستی نێوان حکومەتی سووریا و هەسەدە کردووە.

ڕاگەیێنراوی فەرمی: تیم هاوکینز، وتەبێژی سێنتکۆم، ڕایگەیاند: ئەمریکا جەختی لە گرنگی پابەندبوونی ڕێککەوتنی ئاگربەست لە نێوان هێزەکانی حکومەتی سووریا و هێزەکانی سووریای دیموکرات (هەسەدە) کردووەتەوە. هاوکات پلانی سێنتکۆم، بۆ گواستنەوەی نزیکەی 7 هەزار دەستگیرکراوی داعش لە سووریاوە بۆ عێراق تاوتوێ کراوە.

فەرماندەی فەرماندەیی ناوەندی ئەمریکا. داوای لە حکومەتی سووریا و تەواوی هێزەکانی دیکە کردووە، هاوکار بن و دوور بکەونەوە لە هەر کار و کردەوەیەک کە ببێتە ڕێگر لەبەردەم پڕۆسەی گواستنەوەی دەستگیرکراوانی داعش. 

زانیاریی زیاتر: بەگوێرەی زانیارییەکانی نێو ڕاگەیێندراوەکە، هەردوولا پابەندبوونی خۆیان بۆ تێکشکاندنی یەکجاریی داعش و ڕێگریکردن لە سەرهەڵدانەوەی ئەو ڕێکخراوە دووپاتکردەوە. سێنتکۆم ئاماژەی بەوەش کردووە، ڕێگرییکردن لە سەرهەڵدانەوەی داعش نەک تەنیا بۆ ناوچەکە، بەڵکو بۆ ئاسایشی ئەمریکا و هەموو جیهان گرنگ و پێویستە.