شەپۆڵێکی دیکەی بەفربارین ڕوو لە هەرێمی کوردستان دەکات

ئاڤا نیوز

 
بەپێی پێشبینییەکانی کەشناسی، شەوی پێنج شەممە 22-1-2026، کاریگەریی بارستە هەوایەکی ساردی جەمسەری ڕوو لە هەرێمی کوردستان دەکات، بەهۆیەوە پلەکانی گەرما دادەبەزێت و لە زۆربەی ناوچەکان بەفربارین دەست پێ دەکات.

 

بڵاوکراوەی فەرمی: بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان بڵاوی کردەوە، ڕۆژی هەینی ڕێکەوتی 23-1-2026 لە زۆربەی کاتەکان هەرێمی کوردستان دەکەوێتە ژێر کاریگەریی شەپۆڵێکی بەفربارین، لەگەڵ بەفربارینەکە هەندێ ناوچە نمە باران دەبێت و بەفر لە سەنتەری شارەکان بەڕیژەی جیا جیا دەبارێت.

 

ئەوەی پێشبی دەکرێت: کاریگەری ئەم شەپۆڵەی بەفربارین تاوەکوو درەنگانی شەوی هەینی و کاتەکانی بەرەبەیانیی ڕۆژی شەممە 24-1-2026 بەردەوام دەبێت، لە سنووری ئیدارەی گەرمیان و بەشێک لە سنووری باشووری پارێزگای هەولێر، باران بارینی پچڕ پچڕ و مامناوەندی دەبێت، هەندێ کاتیش بە تێکەڵی بەفر و باران دەبارێت، چاوەڕوان دەکرێت لە ڕۆژی شەممە کاریگەری ئەم شەپۆڵە کۆتایی بێت.

 

باکگراوند؛ ئەمە لەکاتێکدایە چەند ڕۆژێک لەمەوپێش، شێخ دارا حەسەن، شارەزای کەشناسی و پێشکەشکاری ئاڤا میدیا، لە هەواڵەکانی سەعات حەوت ئاماژەی بەوەکرد؛ لەکۆتایی ئەم هەفتەیە شەپۆڵێکی دیکەی بەفر و بارانبارین ڕوو لە هەرێمی کوردستان دەکاتەوە.