بەهۆی سەرماوسۆڵە لە کوێ پشووە و لە کوێ پشوو نییە؟

ئاڤا نیوز

شەپۆلێکی بەفربارین ناوچە جیاوازەکانی هەرێمی کوردستان دەگرێتەوە و ئاڤا میدیا دوایین زانیاری لەبارەی پشوو فەرمییەکان بڵاودەکاتەوە.

چیرۆکی سەرەکی: بەگوێرەی پێشبینییەكانی بەڕێوەبەرایەتیی گشتیی كەشناسی و بوومەلەرزەزانی هەرێمی كوردستان، لە شەوی پێنجشەممە 22ـی ئەم مانگەوە، شەپۆلێكی بەفربارین زۆربەی ناوچەكانی هەرێمی كوردستان دەگرێتەوە و کاریگەرییەکانی تاوەکو بەرەبەیانی ڕۆژی شەممە بەردەوام دەبێت.

لێدوانە فەرمییەکان: ئاڤا لەبارەی پشوو قسەی لەگەڵ پارێزگار و ئیدارە سەربەخۆکان کردووە:

٠ ئومێد خۆشناو، پارێزگاری هەولێر: سبەی دەوام ئاساییە و پشوو نییە.

٠ عەلی تەتەر، پارێزگاری دهۆک: لە گفتوگۆداین ئەگەر پێویست بکات دەیکەین بە پشوو، بەڵام تا ئێستا بەپێیوستمان نەزانیوە.

٠ مامۆستا نەژاد عبدوڵڵا، بەرێوەبەری گشتی پەروەردەی سلێمانی: پاش ڕاوێژ لەگەڵ بەڕێز پارێزگاری سلێمانی سبەی پێنجشەممە، لەسەرجەم ناوەندەکانی خوێندن، دەوام لە کاتژمێر نۆ دەستپێدەکات.

٠ نەژاد عەبدوڵڵا، بەڕێوەبەری پەروەردەی سلێمانی: دەسەڵات دراوەتە بەڕێوەبەری پەروەردەی قەزا و ناحیەکان و ناوشار کە ڕۆژهەلات و ڕۆژئاوایە، ئەگەر پێویست بکات دەتوانن پشوو ڕابگەیێنن، بۆیە تا ئێستا پشوو ڕانەگەیێنراوە. تەنیا لە قەزای پێنجوێن، هەردوو ناحیەی ناڵپارێز و گەرمک پشووە.

٠ نوخشە ناسیح، پارێزگاری هەڵەبجە: لە سەنتەری هەڵەبجە دەوامی فەرمییە، بەڵام لەنێو ناحیەی بیارە و گوندی دەگاشێخان، گوندی بەڵخە، شارەدێی تەوێڵە، پشووی فەرمییە.

٠ ئیدارەی سۆران، لە قوتابخانە و زانکۆ و پەیمانگەکان دەوامی فەرمییە، لە هەموو قەزا و ناحییەکان، سەنتەری سۆران، چۆمان، ڕواندز، مێرگەسۆر، سیدەکان و خەلیفان.

٠ هیوا قەرەنی، سەرپەرشتیاری ئیدارەی ڕاپەڕین: سبەی دەوامی فەرمییە.

٠ بەڕێوەبەری گشتیی پەروەردەی زاخۆ: ئیدارەی زاخۆ، سبەی دەوامی فەرمییە.

٠ ئیدارەی گەرمیان، سبەی دەوامی فەرمییە.