لە ئامێدی بەفر ڕێگای 100 گوندی داخستووە لە سلێمانیش هۆشداری دەدرێت

ئاڤا نیوز

بەهۆی بارینی بەفرێکی زۆر لە ئامێدی ڕێگای 100 گوند داخراوە، بەڕێوەبەرایەتیی هاتووچۆی سلێمانیش، ئاگاداری شۆفێران دەکاتەوە چەند ڕێگایەکییان بە ڕووی شۆفێراندا داخستووە تا گرفتی هاتووچۆ دروست نەبێت.

ڕاگەیێنراوی فەرمی: بەڕێوەبەرایەتیی هاتووچۆی سلێمانی بڵاوی کردووەتەوە ئەم ڕێگایانە بەکارنەهێنن و بەهۆی بەفربارینی زۆرەوە، گیراون تا هاتووچۆی تێدانەکرێت:

٠ چاڤی لاند بۆ گۆیژە.
٠ دۆڵەمیران ـ هەڕووتە ـ شاخی گۆیژە لە فولکەی ئەحمەد گرێدەرەوە.
٠ ڕێگای تونێلی پێشڕەو ئێستا کراوەیە و گرفتی تێدانییە، بەڵام ڕەنگە لە چەند کاتژمێری داهاتوودا گرفت دروست ببێت و بەربەست بکرێت.

زانیاریی پەیامنێر: لە ئامێدی بەهۆی زۆری بەفربارینەوە، ڕێگای 100 گوند داخراوە، بەپێی زانیارییەکانی کاروان عەلی، پەیامنێری ئاڤا لە ئامێدی، لەشەوی ڕابردووەوە شەپۆلێکی بەفربارین سنووری ئامێدی گرتووەتەوە و بەردەوامە، چوار تیمی ڕاماڵینی بەفر سەر بە بەڕێوەبەرایەتیی ڕێگاوبانی دهۆک بەردەوام کاردەکەن بۆ پاککردنەوەی ڕێگا سەرەکییەکان، بەڵام ڕێگای گوند و کۆمەڵگاکان بە بەفر داخراون و هاتووچۆ پەکی کەوتووە.

لێدوانی فەرمی: ئەندازیار ئەفراس ئامێدی، سەرۆکی شارەوانی ئامێدی بە ئاڤای وت، بەردەوام بە هەشت ئامێری ڕاماڵینی بەفر کاردەکەن بۆ ئەوەی هاتووچۆی خەڵک نەوەستێت، ئەمشەویش خوێ لە ڕێگاکان دەڕێژین بۆ ئەوەی خلیسک کەمبێتەوە.

زانیاریی زیاتر: تا ئێستا ڕێژەی بەفربارین لەم ناوچانەی ئامێدی بەم شێوەیەیە:

٠ کانی ماسێ و دەروازەی سەرزێر زیاتر لە 38 سم
٠ ناوەندی ئامێدی زیاتر لە 30 سم
٠ شێلادزێ و دێرەلۆک زیاتر لە 27 سم
٠ بامەرنی 41 سم
٠ چەمانکێ 36 سم
٠ ناوەندی سەرسەنگ 37 سم