پێشمەرگەی یەکەی 70 دەبنە خاوەن هەژماری من

ئاڤا نیوز

پڕۆسەی دابەشکردنی کارتی بانکیی "هەژماری من" بۆ یەکەمجار لەناو ڕیزەکانی یەکەی 70ـی هێزەکانی پێشمەرگە دەستیپێکرد، تاوەکو لە ماوەی مانگێکدا 40,000 پێشمەرگە کارتەکانیان وەربگرن.

چیرۆکی سەرەکی: لە چوارچێوەی پڕۆژەی نیشتمانیی "هەژماری من" بۆ بەبانکیکردنی مووچەی فەرمانبەران و هێزە ئەمنییەکان، لە قۆناغی یەکەمدا 150 کارتی بانکی بەسەر ئەفسەر و پێشمەرگەکانی یەکەی 70ـدا دابەش کران تاوەکو بەپێی ئەو پلانەی تیمە پسپۆڕەکان دایانڕشتووە نزیکەی 40,000 پێشمەرگە ببنە خاوەن هەژماری بانکیی تایبەت بە خۆیان لە ماوەی یەک مانگدا. 

لێدوانی فەرمی: سەرچاوەیەک لە وەزارەتی دارایی و ئابووریی بە ئاڤای ڕاگەیاند: بەپێی پلانی تیمی هەژماری من، لەمەودوا ڕۆژانە 1,000 کارت بەسەر پێشمەرگەکانی یەکەی 70 لە سەرانسەری هەرێمی کوردستاندا دابەش دەکرێت و تەواوی پڕۆسەکە لە ماوەی تەنها یەک مانگدا کۆتایی دێت.

باکگراوند: پڕۆژەی "هەژماری من" یەکێکە لە خزمەتگوزارییە دیجتاڵییەکانی حکومەتی هەرێمی کوردستان بۆ بەبانکیکردنی مووچەی فەرمانبەرانی کەرتی مەدەنیی و هێزە ئەمنییەکانیش تاوەکو فەرمانبەران لە کەمترین کات و بە ئاسانترین شێوەیە دەستیان بە شایستە داراییەکانیان بگات.