گەمارۆی سەر کۆبانێ شکێنرا و یەکەم کاروانی هاوکارییەکان گەیشت

ئاڤا نیوز

دوای 8 ڕۆژ لە گەمارۆدانی تەواوەتیی، لەژێر فشاری نێودەوڵەتییدا ڕێڕەوی مرۆیی بۆ کۆبانێ و حەسەکە کرایەوە و یەکەم کاروانی هاوکارییەکانی نەتەوە یەکگرتووەکان گەیشتە شارەکە.

زانیاریی پەیامنێر: ڕەزوان بیزار، پەیامنێری ئاڤا لە کۆبانی ڕایگەیاند: ئێوارەی ئەمڕۆ یەکەم هاوکاریی مرۆیی نەتەوە یەکگرتووەکان کە 26 بارهەڵگری دەرمان، سووتەمەنیی و خۆراکی تێدایە، لەرێگەی ڕێکخراوی بەهارەوە گەیشتووەتە ناو کۆبانێ تاوەکو بەسەر هاووڵاتییاندا دابەش بکرێت کە تاکە رێکخراویی مرۆییە لەناو کۆبانێ مابێت، ئەو هاوکارییەکە وەردەگرێت و دابەشی دەکات. 

زانیاریی زیاتر: دۆخی کۆبانێ بەهۆی بڕینی تەواوەتیی خزمەتگوزارییەکانی ئاو، کارەبا و ئینتەرنێتەوە گەیشتووەتە ئاستێکی یەکجار مەترسیدار و ژیانی زیاتر لە 385,000 کەسی خستووەتە مەترسییەوە، کە 45,000 کەسیان ئاوارەی نوێی شارەکانی ڕەققە، عەفرین و تەبقان.

ئەمەش بزانە: لە چەند ڕۆژی ڕابردوودا تەنها یەک فڕنی نان لە هەموو شارەکەدا کاری کردووە و ئەویش بەهۆی نەبوونی ئاردەوە لە لێواری پەککەوتن بووە، هاوكات نەبوونی دەرمان و پێداویستیی پزیشکیی وایکردووە بریندارەکان بەبێ چارەسەر بمێننەوە.

ئەوەی پێویستە بیزانیت: حکومەتی سووریا لەژێر فشاری نێودەوڵەتییدا دوو ڕێڕەوی مرۆیی بۆ گەیاندنی هاوکارییەکان کردووە بەمشێوەیە؛ ڕێڕەوی یەکەم بە هەماهەنگی لەگەڵ پارێزگای حەسەکە دەکرێتەوە لەسەر ڕێگەی ڕەققە - حەسەکە لە نزیک گوندی تەل داوود.

ڕێڕەوی دووەم بە هەماهەنگی لەگەڵ پارێزگای حەلەب لە دووڕیانی کۆبانێ لەسەر ڕێگەی ئێم فۆر نزیک گوندی نوور عەلی دەکرێتەوە.

لەلایەکی دیکەوە: دەزگای خێرخوازی بارزانی ئێستا لە هەوڵدایە بەزووترین کات هاوکارییە مرۆییەکانی بگەیەنێت بە کۆبانێ تاوەکو دابەش بکرێت بەسەر هاووڵاتییان و ئەو کەسانەی پێویستییانە.