نەشتەرگەریی شێرپەنجەی زمان بۆ ژنێکی 70 ساڵ دەکرێت

ئاڤا نیوز 

تیمێکی پزیشکی لێهاتوو لە شاری هەولێر نەشتەرگەرییەکی سەرکەوتوویان بۆ نەخۆشێکی خەڵکی کەرکووک ئەنجامدا کە تووشی نەخۆشی شێرپەنجەی زمان هاتبوو. 

ئەوەی پێویستە بیزانیت: بەگوێرەی پسپۆڕانی بواری نەخۆشی شێرپەنجە، ئەنجامدانی نەشتەرگەریی شێرپەنجە، یەکێکە لە قورسترین نەشتەرگەرییەکان، بەڵام پزیشکێک لە شاری هەولێر، نەشتەرگەریی بۆ ژنێکی بەتەمەن بەسەرکەوتوویی ئەنجامدا. 

لێدوانی فەرمی: د. سەعید توتمەیی، پسپۆڕی ڕوو و شەویلاگ بە ئاڤای ڕاگەیاند: نەشتەرگەریمان بۆ ژنێکی تەمەن 70 ساڵ ئەنجامدا، کە لە قۆناغی دووەمی توشبوون بە شێرپەنجەی زمان بوو، نەشتەرگەرییەکەش شەش کاتژمێری خایاند.

هاوکات د.سەعید توتمەیی وتیشی: "نەخۆشەکە خەڵکی کەرکووک بوو، بەڵام لێم نەپرسی ئاخۆ جگەرەکێشە یان نا."

زانیاریی زیاتر: مەترسییەکانی توشبوون بە نەخۆشی شێرپەنجەی زمان ئەمانەن:

٠ خواردنی ناتەندروست و ماوە بەسەرچوو.
٠ جگەرەکێشان.
٠ خواردنەوەی زۆری ماددە گازی و کهولییەکان.
٠ پیسبوونی ژینگە.
٠ هەندێکجار بۆماوەییە و دەگوازرێتەوە.

نیشانەکانی توشبوون بە نەخۆشی شێرپەنجەی زمان بریتین لە:

٠ ئەگەر برین لەنێو دەمدا دروست بوو و چارەسەری بۆ وەرگیرا، بەڵام دوای 20 ڕۆژ برینەکە چاکنەبووەوە، ئەوا پێویستە کەسەکە سەردانی پزیشکی ڕوو و شەویلاگ بکات و پشکنینی بۆ بکرێت، 

٠ ئەگەر خوێن لە دەم هات، بەمەرجێک ئیلتیهابی پووک نەبێت.

ئەمەش بزانە: لە ماوەی سێ ڕۆژی ڕابردوو، ئەمە دووەم گەورەترین نەشتەرگەرییە لە شاری هەولێر ئەنجام دەدرێت، پێشتر کەسێکی دیکە نەشتەرگەرییەکی گەورەی ڕوو و شەویلاگی بە سەرکەوتوویی بۆ ئەنجام درابوو.