وەزارەتی تەندروستی بڕیارێکی نوێ لە بەرژەوەندی دەرچووانی دانەمەزراو جێبەجێ دەکات

ئاڤا نیوز

 

وەزارەتی تەندروستیی حکومەتی هەرێمی کوردستان بڕیارێکی نوێ لە بەرژەوەندی دەرچووانی دانەمەزراو جێبەجێ دەکات و دەبێت لانیکەم 60٪ـی ستافی سەرجەم نەخۆشخانەکانی کەرتی تایبەت دەرچووانی دانەمەزراو بێت.

 

بۆچی گرنگە: ئەم بڕیارە هەوڵێکی ڕاستەوخۆی حکومەتە بۆ کەمکردنەوەی بێکاری لەنێو دەرچووانی بەشە پزیشکییەکان و گواستنەوەی بەشێک لە ئەرکی دامەزراندن لە کەرتی گشتییەوە بۆ کەرتی تایبەت.

 

لێدوانی فەرمی: د. سامان بەرزنجی، وەزیری تەندروستیی هەرێمی کوردستان، بە ئاڤای گوت: لەپێناو دۆزینەوەی هەلیکار بۆ دەرچووانی دانەمەزراو بە تایبەت دەرچووانی بەشە پزیشکییەکان، ئەمساڵ ئەو بڕیارە جێبەجێ دەکەین کە دەبێت ڕێژەی دەرچووانی دانەمەزراو لە ستافی نەخۆشخانەکانی کەرتی تایبەت لە 60٪ کەمتر نەبێت.

 

- وەزیری تەندروستی دووپاتی کردەوە، لە نوێکردنەوەی مۆڵەتی نەخۆشخانەکانی کەرتی تایبەت، جێبەجێکردنی ئەو بڕیارە دەکەین بە مەرج و دەبێت سەرجەم ئەو نەخۆشخانانە پابەندی ئەو بڕیارە بن.

 

- هەرچەندە حکومەتی عێراق لە یاسای بودجە پلەی دامەزراندنی بۆ هەرێمی کوردستان تەرخان نەکردووە، بەڵام بە بڕیاری سەرۆکوەزیران مەسرور بارزانی ساڵانە دامەزراندنی سنووردارمان بۆ کەرتی تەندروستی کردووە.

 

باکگراوند: ڕۆژی  18-06-2025، سەرۆکوەزیران مەسرور بارزانی، فەرمانێکی پەسەندکرد بۆ دامەزراندنی 775 دەرچووی بەشە پزیشکییەکانی زانکۆکانی کوردستان بۆ ساڵی 2023-2024 لە زانکۆکانی هەولێر، سلێمانی، دهۆک، زاخۆ، کۆیە، گەرمیان و زانکۆی کوردستان بوون، ئەوەش لە سەر میلاکی وەزارەتی تەندروستی و مووچەیان لەسەر داهاتی ناوخۆ بۆ دابین کرا.