لە بەشێکی هەرێمی کوردستان گرفتی پچڕانی کارەبا دروست بووە و وەزارەت ڕوونکردنەوە دەدات

ئاڤا نیوز

بەهۆی کێشەیەکی تەکنیکیی لە هێڵەکانی گواستنەوەی گازی سرووشتیی، پچڕانی کارەبا لە هەولێر، سلێمانی و دهۆک دروستبوو و تیمەکانی وەزارەتی کارەبا سەرقاڵی چارەسەرکردنین.

وێنە گەورەکە: هەرێمی کوردستان بۆ بەرهەمهێنانی وزەی کارەبا بە ڕێژەیەکی زۆر پشت بە گازی سرووشتیی دەبەستێت؛ هەر گرفتێک لە کێڵگەکان یان هێڵەکانی گواستنەوەدا ڕوو بدات، ڕاستەوخۆ کار دەکاتە سەر بڕی بەرهەمهێنانی کارەبا لە وێستگەکان.

ڕاگەیێنراوی فەرمی: وەزارەتی کارەبای هەرێمی کوردستان لە ڕاگەیێنراوێکدا ئاشکرای کرد: بەهۆی کێشەیەکی تەکنیکیی لە هێڵەکانی گواستنەوەی گازی سرووشتیی بۆ وێستگەکانی کارەبا، گرفتی پچڕان لە بەشێک لە پارێزگاکانی هەولێر، دهۆک و سلێمانی دروستبوو و بە شێوەیەکی کاتیی کاریگەریی لەسەر تۆڕی کارەبای نیشتمانیی دەبێت.

هەر لە ڕاگەیێنراوەکەی وەزارەتی کارەبادا هاتووە؛ تیمە تەکنیکییەکان ڕاستەوخۆ دەستیان بە کارەکانیان کردووە بۆ دۆزینەوەی سەرچاوەی گرفتەکە تاوەکو ڕێگریی لە پچڕانی درێژخایەن بگرن و لە چەند کاتژمێری داهاتوودا دۆخی پێدانی کارەبا بە هاووڵاتییان دەگەڕێتەوە ئاستی ئاسایی خۆی.