لە ئەفغانستان بەهۆی سەرما و بەفربارین 60 کەس گیانیان لەدەستدا

ئاڤا نیوز

شەپۆلێکی توندی سەرما و بەفربارینی چڕ ئەفغانستانی گرتووەتەوە و لە ماوەی تەنها 3 ڕۆژدا بووەتە هۆی گیانلەدەستدانی 60 کەس و برینداربوونی دەیان کەسی دیکە.

لێدوانی فەرمی: یوسف حەماد، وتەبێژی بەڕێوەبەرایەتیی ڕووبەڕووبوونەوەی قەیرانەکانی تاڵیبان ڕایگەیاند: "بەفربارین و شەختە هۆکاری سەرەکیی ئەو قوربانییانەن و تیمەکانی فریاگوزاریی لە هەوڵی بەردەوامدان بۆ گەیاندنی کۆمەک بۆ ناوچە گەمارۆدراوەکان."

زانیاریی زیاتر: لە ماوەی تەنها 3 ڕۆژدا، چڕیی بەفربارین بووەتە هۆی وێرانبوونی 458 خانوو لە 15 شاری جیاوازدا، کە پشکی شێری بەر کابولی پایتەخت کەوتووە. مەترسییەکان تەنها لە سەرماکەدا نین، بەڵکو 110 کەسیش بەهۆی ڕووخانی سەقفی خانووەکان و ڕووداوەکانی هاتوچۆ بریندار بوون. دۆخەکە لەو ناوچانە خراپترە کە پێشتر بەهۆی بوومەلەرزەوە ژێرخانەکەیان بە تەواویی تێکچووە، چونکە زۆربەی هاووڵاتییان لەناو خێمە یان خانووی کاتییدا دەژین کە بەرگەی ئەم سەرما و کێشی بەفرە ناگرن و هیچ هۆکارێکی گەرمکەرەوەی پێویستیان لەبەردەستدا نییە.

ئەوەی پێویستە بیزانیت: 60 کەس گیانیان لەدەستداوە و 110 کەس بریندارن و  458 خانوو لە 15 شاردا بە تەواویی تێکچوون. ئەم کارەساتە سروشتییە لە کاتێکدایە کە ناوچەکانی ڕۆژهەڵاتی ئەفغانستان هێشتا بەدەست لێکەوتەکانی بوومەلەرزە بەهێزەکەی پێشووەوە دەناڵێنن، کە تێیدا زیاتر لە 2,200 کەس گیانیان لەدەستدا و هەزاران خێزان بێماڵ و حاڵ مانەوە؛ ئەم شەپۆلە سەرمایەش باری گوزەرانیانی زیاتر قورس کردووە.