لە دهۆک چالاکی درێژترین کەزی بەڕێوەدەچێت

ئاڤا نیوز

چالاکییەکان لە قوتابخانە و زانکۆ و پەیمانگاکان بۆ پاڵپشتیی ڕۆژئاوای کوردستان تا دێت زیاتر دەبێت، لە پەیمانگای هونەرە جوانەکانی دهۆک چالاکییەک بۆ هۆنینەوەی "کەزی" بەڕێوەچوو.

چیرۆکی سەرەکی: کەزی بووە بە سیمبوولێکی نوێی بەرخۆدان، کورد لە هەر شوێنێک بێت وە بە هەر جۆرێک بێت پاڵپشتیی خۆی بۆ ڕۆژئاوای کوردستان دەردەبڕێت، ئەمەش دوای ئەوەی یەکێک لە چەکدارانی سوپای سووریا کەزی خانمێکی کوردی لە ڕۆژئاوا بڕی و کاردانەوەی زۆر تووندی بەدوای خۆیدا هێنا.

لێدوانی فەرمی: باوەر جەمیل، مامۆستا و خاوەنی بیرۆکەی درێژترین کەزی لە دهۆک، قسەی بۆ ئاڤا کرد و وتی: "من وەکو هونەرمەند پاشان وەکو مامۆستایەک، بە هەر ڕێگایەک بێت هەوڵدەدەین بەشێک بین لەوانەی هاوکاریی و پاڵپشتی کوردانی ڕۆژئاوا دەکەن، ئێمە لە ڕێگەی هونەرەوە دەمانەوێت پەیامەکەمان بگات." 

 

زانیاریی زیاتر: ئەمڕۆ، لە پەیمانگای هونەرە جوانەکانی دهۆک، چالاکی درێژترین کەزی بەڕێوەچوو، تیایدا دەیان قوتابی و مامۆستا و ئامادەبووان، بەشدارییان لەو چالاکییە کرد و پەیامی خۆیان دژ بە دەستدرێژی گرووپە چەکدارەکانی سووریا بۆ سەر خانمان و شەڕڤانانی ڕۆژئاوا دەڕبری.