وڵاتانی ئەوروپا و ئەمریکا چەند داواکارییەک لە هەسەدە و دیمەشق دەكەن

ئاڤا نیوز

 

هەریەک لە وڵاتانی ئەڵمانیا، فەرەنسا، بەریتانیا و ئەمریکا داوا لە دیمەشق و هەسەدە دەکەن ڕێککەوتنێک بکەن بۆ ئاگربەستی هەمیشەیی. هاوکات دەستخۆشی لە ڕۆڵی "کاریگەری هاوبەشەکان، لەوانە عێراق، حکومەتی هەرێمی کوردستان، حکومەتی سوریا و هەسەدە، بۆ ڕووبەڕووبوونەوەی مەترسییەکانی داعش دەکەن."

 

ڕاگەیێنراوی فەرمی: فەڕەنسا، ئەڵمانیا، بەریتانیا و ئەمریکا ڕاگەیێنراوێکی هاوبەشیان سەبارەت بە دۆخی سووریا بڵاو کردەوە و تیایدا پێشوازیی لە درێژکردنەوەی ئاگربەستی نێوان دیمەشق و هەسەدە بۆ 15 ڕۆژ دەکەن و داوا دەکەن ڕێککەوتنێک بۆ ئاگربەستێکی هەمیشەیی بێتە ئاراوە.

 

- هاوکات جەخت لە چارەسەری سیاسی، پاراستنی مەدەنییەکان، بەرەنگاربوونەوەی داعش و جێبەجێکردنی ڕێککەوتنی 18ی کانوونی دووەم دەکەنەوە.

 

- ڕاگەیێنراوەکە داوا لە هەموو لایەنەکان دەکات پابەندی تەواوی ئاگربەستەکە بن و دان بە خۆیاندا بگرن، هەروەها پێشوازی لە کردنەوەی ڕێڕەوی مرۆیی کراوە بۆ گەیاندنی هاوکارییەکان و جەختکراوەتەوە کە دەبێت خزمەتگوزارییە بنەڕەتییەکان بۆ شاری کۆبانێ بگەڕێنەوە.

 

- دەستخۆشی لە ڕۆڵی کاریگەری هاوبەشەکان کراوە، لەوانە عێراق، حکومەتی هەرێمی کوردستان، حکومەتی سوریا و هەسەدە، بۆ ڕووبەڕووبوونەوەی مەترسییەکانی داعش. هەروەها بڕیاردراوە کۆبوونەوەیەکی خێرای "هاوپەیمانی نێودەوڵەتی دژی داعش" ئەنجام بدرێت بۆ ڕێگریکردن لە هەر بۆشاییەکی ئەمنی لە دەوروبەری زیندانەکانی داعش.

 

ئەوەی پێویستە بیزانیت: لایەنە نێودەوڵەتییەکان ئامادەیی خۆیان نیشانداوە بۆ چاودێریکردن و پشتگیریکردنی جێبەجێکردنی ئەو ڕێککەوتنانەی کە دەبنە هۆی پاراستنی مافی هەموو سوورییەکان و سەقامگیری باکووری خۆرهەڵاتی سووریا لە ڕێگەی میکانیزمی ئاشتیانەوە.

باکگراوند: ڕۆژی شەممەی ڕابردوو دیمەشق و هەسەدە درێژکردنەوەی ئاگربەستیان بۆ ماوەی 15 ڕۆژ بە نێوەندگیریی ئەمریکا و فەڕەنسا ڕاگەیاند، مەبەستی گواستنەوەی زیندانییانی داعش، بەڵام ململانێی کۆنتڕۆڵکردنی ناوچە کوردییەکان لەلایەن چەکدارانی سوپای عەرەبیی سووریا وای کردووە بەرەکانی شەڕ بە گەرمی بمێننەوە و مەترسیی هەیە کارەساتی مرۆیی لە کۆبانی و حەسەکە ڕووبدات.