ئیسرائیل دەیەوێت ڕێککەوتنێکی ئەمنی 10 ساڵە لەگەڵ ئەمریکا واژۆ بکات

ئاڤا نیوز

ڕێککەوتنی ئەمنی نێوان ئەمریکا و ئیسرائیل لە ساڵی 2028 کۆتایی دێت، ئیسرائیل لەگەڵ ئیدارەی دۆناڵد ترەمپ ئامادەکاریی بۆ دانووستاندن دەکات، بەئامانجی گەیشتن بە ڕێککەوتنێکی نوێ بۆ ماوەی 10 ساڵ.

چیرۆکی سەرەکی: ڕۆژنامەی 'فاینانشیاڵ تایمز'ی ئەمریکی ئاشکرای دەکات، ئیسرائیل خۆی بۆ دانووستان لەگەڵ ئیدارەی دۆناڵد ترەمپ، سەرۆکی ئەمریکا ئامادە دەکات بۆ واژۆکردنی ڕێککەوتنێکی نوێی ئەمنی کە ماوەکەی 10 ساڵە،  هاوکات ڕێگە بە ئیسرائیل دەدات پشتیووانی سەربازیی ئەمریکا بۆماوەیەکی زیاتر بەدەستبهێنێت.

لێدوانی فەرمی: گیل پینچاس، پێش ئەوەی لە پۆستی سەرۆکی ڕاوێژکاری دارایی وەزارەتی بەرگریی ئیسرائیل، بکشێتەوە وتی: "ئیسرائیل هەوڵدەدات پڕۆژە سەربازیی و بەرگرییە هاوبەشەکان لە پێشینەکانیدا دابنێت پێشبینی دەکات لە هەفتەکانی داهاتوودا لەبارەی ئەم پرسەوە دانوستان ئەنجام بدرێت."

ئەم مشتومڕە لە کاتێکدایە، سەرکردەکانی ئیسرائیل، ئاماژە بەوە دەکەن، ئەمریکا پلانی هەیە بۆ داهاتوو ئەو یارمەتیی داراییانەی کە پێشکەشی دەکات کەمبکاتەوە.

لێدوانی لایەنی بەرامبەر: بنیامین نەتانیاهۆ، سەرۆکوەزیرانی ئیسرائیل، ڕایگەیاند: "دەیەوێت وڵاتەکەی لەداهاتوودا پشتبەستن بە هاوکارییە سەربازییەکانی ئەمریکا کەمبکاتەوە."

باکگراوند:  ساڵی 2016، ئەمریکا و ئیسرائیل، یاداشتێکی لێکتێگەیشتنیان بۆ ماوەی 10 ساڵ واژۆکرد، لە مانگی ئەیلوولی 2028 کۆتایی دێت، کە تێیدا 38 ملیار دۆلار یارمەتی سەربازیی دابینکرابوو.

ئەمەش بزانە: تا ئێستا وەزارەتی دەرەوەی ئەمریکا هیچ لێدوانێکی لەبارەی درێژکردنەوەی ڕێککەوتنی ئەمنی لە نێوان ئەمریکا و ئیسرائیل نەداوە.