ئێران هەناردەکردنی کارەبای بۆ عێراق بە تەواوی ڕاگرت

ئاڤا نیوز

هەناردەکردنی کارەبای ئێران بۆ عێراق بە تەواوی وەستاوە و ئاستی دابینکردنی وزەی کارەبا گەیشتووەتە سفر مێگاوات، ئەمەش لە کاتێکدایە تاران لە هەندێک وڵاتی دراوسێیەوە بڕێکی زۆر کارەبا هاوردە دەکات.

ڕاگەیێنراوی فەرمی: کۆمپانیای بەرهەمهێنان و دابشکردنی کارەبا، لە ئێران لە ڕاگەیێنراوێکدا ئاماژە بەوە دەدات، ئێستا ئێران تەنیا 20 مێگاوات کارەبا بۆ پاکستان و 30 مێگاوات بۆ ئەفغانستان دەنێرێت، لە بەرامبەردا بۆ پڕکردنەوەی پێداویستییەکانی خۆی 507 مێگاوات کارەبا لە تورکمانستان و ئەرمینیاوە هاوردە دەکات. ئەمەش نیشانەی پاشەکشەیەکی گەورەیە لە قەبارەی هەناردەکردنی وزەی ئەو وڵاتە بۆ دەرەوە.

لێدوانی فەرمی: محەممەدەڵڵا داد، جێگری کاروباری گواستنەوە و بازرگانیی دەرەوە، لە کۆمپانیای کارەبای ئێران، ڕایگەیاند: "وەستانی هەناردەی کارەبا بۆ عێراق بۆ گوشارە نێودەوڵەتییەکان، پەیوەندییە سیاسییەکان و بارودۆخی ئاڵۆزی ناوچەکە دەگەڕێتەوە. هەروەها ئاماژەی بەوەش کرد کە لە ساڵانی ڕابردووشدا چەند جارێک لە مانگی شوباتدا ناردنی کارەبا وەستاوە."

زانیاریی زیاتر: سەبارەت بە پچڕانی ئینتەرنێت، محەممەدەڵڵا داد، دەڵێت: "پچڕانی ئینتەرنێت کاریگەریی نەرێنی لەسەر بەرهەمهێنانی وێستگەکان نەبووە، بەڵام بەکاربردنی کارەبای بۆ دەرهێنانی دراوە ژمارەییەکان بە بڕی 1500 مێگاوات لە ناوخۆی ئێراندا بە شێوەیەکی بەرچاو کەمکردووەتەوە."