سەدان خانەنشین ئەم مانگە سێ مووچە پێکەوە وەردەگرن

ئاڤا نیوز

سەدان فەرمانبەر کە لە مانگەکانی هەشت، نۆ و 10 ساڵی ڕابردوو خانەنشین بوون، ئەم مانگە دوو تا چوار مووچە پێکەوە وەردەگرن.

لێدوانی فەرمی: سەرچاوەیەک لە بەڕێوەبەرایەتیی خانەنشینیی هەرێمی کوردستان بە ئاڤای ڕاگەیاند: "ئەو فەرمانبەرانەی لە مانگەکانی (8، 9 و 10)ـی ساڵی 2025 خانەنشین بوون و بەهۆی ئەوەی ناویان لەگەڵ لیستی مووچەی مانگی 11 و 12 ساڵی ڕابردوو بوو، بەغدا مووچەی ئەم دوومانگە بۆ مووچەخۆرانی کوردستان خەرج نەکرد، خانەنشینەکانیش مووچەکانیان بۆ خەرج نەکرا."

ئەو سەرچاوەیە وتیشی: "بۆ ئەوەی خانەنشینەکان مووچەکانیان وەربگرن، ناوەکانیان خراوەتە لیستی مووچەی مانگی یەک و تەواوی مووچەی ئەو دوو تا چوار مانگەی ساڵی ڕابردوو پێکەوە وەردەگرن."

زانیاریی زیاتر: سەبارەت بە مووچەی مانگەکانی 11 و 12، سەرچاوەکەی خانەنشینی ئاماژەی بەوە کرد کە چارەنووسی ئەو دوو مانگە هاوشێوەی فەرمانبەرانی دیکە دەبێت، هەر کاتێک بڕیاری خەرجکردنی مووچەی گشتیی ئەو مانگانە درا، ئەم خانەنشینانەش دەگرێتەوە.

ئەمەش بزانە: لەبارەی مینحەی 100 هەزار دیناریی خانەنشینان، سەرچاوەکە دەڵێت: بەڵێن دراوە ئەو بڕە پارەیە خەرج بکرێت، بەڵام تاوەکو ئێستا دیار نییە کەی خەرج دەکرێت ئایا لەم مانگەوە دەستپێدەکات یان دەکەوێتە مانگەکانی داهاتوو.