تەیف سامی وادەی ناردنی مووچەی مانگی یەک ئاشکرا دەکات

ئاڤا نیوز

 

وەزارەتی دارایی کوردستان ئەمڕۆ لیستی مووچەی مانگی یەک و میزان موراجەعەی مانگی ڕابردووی بۆ بەغدا نارد. ئاڤا زانیویەتی، تەیف سامی بە بەرپرسێکی باڵای کوردی ڕاگەیاندووە: هەركاتێك لیستی مووچەی بەدەست بگات، لە ماوەی چەند ڕۆژێكدا بڕیاری خەرجكردنی مووچە دەدات.

چیرۆکی سەرەکی: ئەمڕۆ سێشەممە وەزارەتی دارایی و ئابووریی هەرێمی کوردستان بڵاوی کردەوە لیستی مووچەی مانگی یەکی فەرمانبەران و مووچەخۆرانی هەرێمی کوردستان، لەلایەن تیمی تەکنیکیی وەزارەتی دارایی و ئابووریی هەرێمی کوردستانەوە ڕەوانەی بەغدا کرا و بڕیارە سبەی چوارشەممە ڕادەستی فەرمانگەی ژمێریاریی وەزارەتی دارایی حکومەتی فیدراڵی بکرێت.

زانیاریی ئاڤا: بەرپرسێکی باڵای کورد لە بەغدا بە ئاڤای ڕاگەیاند: ئەمڕۆ قسەم لەگەڵ تەیف سامی، وەزیری دارایی عێراق كرد و پێم وت کەی پارە دەنێرێت؟ لە وەڵامدا تەیف سامی وتوی تا ئێستا لیستم بەدەست نەگەیشتووە، هەركاتێك بگات، لە ماوەی چەند ڕۆژێكدا بڕیاری خەرجكردنی مووچە دەدەین.

-وتیشی: سبەی لیستەكە دەگاتە دەست وەزارەتی دارایی عێراق و لە ماوەی 48 کاتژمێر وردبینی تەواو دەبێت، بەمەش خەرجكردنی مووچە دەكەوێتە هەفتەی داهاتوو ئەگەر هیچ شتێک نەیەتە پێشەوە و بەغدا بیانووی نوێ نەدۆزێتەوە.

ئەوەی پێویستە بیزانیت: لەبارەی ناردنی 120 ملیار دیناری داهاتی نانەوتیش لە وەزارەتی دارایی کوردستان بە ئاڤایان وت: 120 ملیارەکە ئامادەیە و هەر کاتێک داوای بکەن دەینێرین.

- پێشتر وەزارەتی دارایی کوردستان ڕایگەیاندبوو تا ئێستا هیچ بڕیار و ڕێککەوتنێک نییە بۆ خەرجکردنی مووچەی مانگی یەک.

لەلایەکی دیکە: د. شاخەوان عەبدوڵڵا، سەرۆکی فراکسیۆنی پارتی لە پەرلەمانی عێراق بە ئاڤای وت: بەدواداچوونی زۆرمان بۆ پرسی مووچە کردووە، حکومەتی عێراق و حکومەتی کوردستان لە گفتوگۆ و لێکتێگەیشتن نزیکن بۆ ئەوەی مووچەی مانگی یەک خەرج بکرێت.

باکگراوند: ناردنی لیستی مووچە لەسەر داواکاری وەزارەتی دارایی عێراقە، ڕۆژی دووشەممە بە نووسراوی فەرمی داوایان لە وەزارەتی دارایی کوردستان کرد لیستی مووچەیان بۆ بنێرن.