پەروین بوڵدان: تەنیا دیموکراسییەتی خۆجێیی سووریا لە دیکتاتۆرییەت ڕزگار دەکات

ئاڤا نیوز

پەروین بوڵدان، ئەندامی شاندی ئیمراڵی و جێگری سەرۆکی پەرلەمانی تورکیا وردەکاریی نوێ لەسەر تێڕوانینەکانی عەبدوڵڵا ئۆجەلان بۆ دۆخی سووریا، ڕۆژئاوای کوردستان، پڕۆسەی ئاشتی ئاشکرا دەکات و ڕایدەگەیەنێت، چارەسەریی پرسی کورد لە تورکیا هەموو گرێییەکانی ڕۆژهەڵاتی ناوەڕاست دەکاتەوە.

چیرۆکی سەرەکی: پەروین بوڵدان لە چاوپێکەوتنێک لەگەڵ ئاژانسی ژینها، ڕایگەیاند: ئۆجەلان هەمیشە هۆشداریی داوە ئەگەر لە سووریا چارەسەرییەکی دیموکراتی نەیەتە ئاراوە، قەیرانەکە دەبێتە شەڕێکی جیهانی. ئەو پێشنیازی "ڕێگەی سێیەم" دەکات؛ کە تێیدا گەلان بەبێ پشتبەستن بە ڕژێم یان دەستێوەردانی دەرەکی، خۆیان بڕیار لەسەر چارەنووسی خۆیان بدەن. بە بڕوای ئۆجەلان، ئەگەر لە سووریا سیستەمێکی دیموکراتی نەبێت، هەر دەسەڵاتێک بێتە سەر کار بەرەو دیکتاتۆرییەت دەچێت.

 

لێدوانی فەرمی:  پەروین بوڵدان، لەبارەی بە هێزەکانی سووریای دیموکرات (هەسەدە)، دەڵێت: "ئۆجەلان پێیوایە هەسەدە هەڕەشە نییە بۆ سەر تورکیا، بەڵکو دەتوانێت ببێتە گەرەنتیی ئاسایش لەسەر بنەمای هاوسێیەتییەکی دیموکراتی. ئەو ڕەخنەی لە سیاسەتی تورکیا گرت کە هەسەدە وەک دوژمن دەبینێت و وتی، کاتێک ئەو هێزەی دژی داعش جەنگاوە لاواز دەکرێت، شوێنەکەی لە لایەن گرووپە توندڕەوەکانەوە پڕ دەکرێتەوە کە مەترسین بۆ سەر هەمووان."

بوڵدان، دەڵێت: ئاشتیی لە ناوخۆیی تورکیادا، دەرگای ئاشتی لە دەرەوە دەکاتەوە، پێچەوانەی ئەمەش ڕاستە و شەڕی دەرەوەش، ئاشتی لە ناوخۆی تورکیا دەخنکێنێت.

٠ ئەگەر تورکیا لە ناوخۆدا لەگەڵ کورد ڕێک بکەوێت، پەیوەندییەکانی لەگەڵ کوردانی سووریا، عێراق و ئێران لە هەڕەشەوە دەبێتە هێزێکی گەورەی هاوبەش. بەڵام تورکیا وەک وێنەکێشێک وایە کە تەنیا سەیری چوارچێوەی تابلۆکە دەکات و ناوەڕۆکەکەی نابینێت.

 

٠ بۆ ئۆجەلان، ڕۆژئاوای کوردستان تەنیا پارچە زەوییەک نییە، بەڵکو مۆدێلێکی کۆمەڵایەتییە کە ژنان، گەنجان و پێکهاتە جیاوازەکان بونیادیان ناوە. جەختیشی کردەوە کە دیموکراسیی خۆجێیی و هاوسەنگی نێوان ناوەند و ناوچەکان، تاکە ڕێگەیە بۆ ڕزگارکردنی سووریا لەو گێژاوەی تێی کەوتووە.

زانیاریی زیاتر: دەربارەی کۆنووسەکانی دیداری ئیمراڵی لەگەڵ ئۆجەلان، پەروین بوڵدان رەخنەی تووندی لە دەسەڵاتدارانی تورکیا گرت و ڕایگەیاند:  بەبێ ئاگاداریی و ڕاوێژ لەگەڵ ئەوان کۆنووسەکان کراوە و شێوازێکی نادروستە و بەمشێوەیە بڵاودەکرێنەوە.