دیمەشق و هەسەدە جارێکی دیکە کۆ دەبنەوە

ئاڤا نیوز

 

حکومەتی سووریا و هێزەکانی سووریا دیموکرات لە بارەی تێکەڵبوونی هەسەدە لەگەڵ سوپای سووریا کۆ دەبنەوە. بەرپرسێکی سووریا دەڵێت، کۆبوونەوەکە بۆ جێبەجێکردنی ئەو ڕێککەوتنەیە کە بە نێوەندگیریی ئەمریکا کراوە.

 

وێنە گەورەکە: لایەنە نێودەوڵەتییەکان ئامادەیی خۆیان نیشانداوە بۆ چاودێریکردن و پشتگیریکردنی جێبەجێکردنی ئەو ڕێککەوتنانەی کە دەبنە هۆی پاراستنی مافی هەموو سوورییەکان و سەقامگیریی باکووری خۆرهەڵاتی سووریا لە ڕێگەی میکانیزمی ئاشتیانەوە.

 

لێدوانی فەرمی: بەرپرسێکی حکوومەتی سووریا بە ئاژانسی ڕۆیتەرزی ڕاگەیاند، حکوومەتی دیمەشق هیوادارە هەر ئەمڕۆ خولێکی نوێی گفتوگۆکانی تایبەت بە یەکگرتنەوە لەگەڵ هەسەدە دەست پێ بکات.

 

- بە وتەی ئەو بەرپرسە، تەوەرەی سەرەکیی گفتوگۆکان بریتی دەبێت لە دۆزینەوەی میکانیزمی پراکتیکی بۆ جێبەجێکردنی ئەو ڕێککەوتنەی کە لەم مانگەدا بە نێوەندگیری ئەمریکا لە نێوان هەردوولادا واژۆ کراوە.

 

باکگراوند: ڕۆژی شەممەی ڕابردوو دیمەشق و هەسەدە درێژکردنەوەی ئاگربەستیان بۆ ماوەی 15 ڕۆژ بە نێوەندگیریی ئەمریکا و فەڕەنسا ڕاگەیاند، مەبەستی گواستنەوەی زیندانییانی داعش، بەڵام ململانێی کۆنتڕۆڵکردنی ناوچە کوردییەکان لەلایەن چەکدارانی سوپای عەرەبیی سووریا وای کردووە بەرەکانی شەڕ بە گەرمی بمێننەوە و مەترسیی هەیە کارەساتی مرۆیی لە کۆبانی و حەسەکە ڕووبدات.