عێراق زیندانیی تایبەت بۆ چەکداری داعش لە دەرەوەی شارەکان تەرخان دەکات

ئاڤا نیوز

سەرۆکی دەستەی حەشدی شەعبی ڕایدەگەیێنێت، زیندانی تایبەت و تووند و  تۆڵ بۆ چەکدارانی داعش لە دەرەوەی شارە قەرەباڵغەکان تەرخان دەکرێن و تیرۆریستان لەژێر چاودێرییەکی تووندی ئەمنیدا دەبن.

لێدوانی فەرمی: فالح فەیاز، سەرۆکی دەستەی حەشدی شەعبی، لە لێدوانێکدا بۆ ئاژانسی هەواڵی عێراقی ئاشکرای کرد دروستکردنی زیندانی لە دەرەوەی شارەکان بۆ پاراستنی ئاسایشی شارەکانە، بەتایبەتی شاری مووسڵ.

 

-  دۆخی ناوچەکە ناجێگیرە و پێویستە حەوت هەزار زیندانیی داعش لە شوێنی پارێزراودا بن تاوەکو هیچ مەترسییەک بۆ سەر سنوورەکان و ناوخۆی وڵاتەکە دروست نەبێت.

 

- هێزە ئەمنییەکان و حەشدی شەعبی لەوپەڕی ئامادەباشیدان و لە ڕۆژانی داهاتووشدا پەرلەمانی عێراق دەنگ لەسەر یاسای نوێی ڕێکخستنی کاروباری حەشدی شەعبی دەدات.

باکگراوند: چوارشەممەی ڕابردوو، فەرماندەیی ناوەندیی هێزەکانی ئەمریکا (سێنتکۆم) ڕایگەیاند، زیندانیانی داعش کە لەژێر دەسەڵاتی هەسەدە لە زینداندابوون، لە سووریا دەگوازرێنەوە عێراق و ژمارەیان حەوت هەزار کەس دەبێت و لە عێراق دەستبەسەر دەکرێن.