کچێکی تووشبوو بە ئۆتیزم لە قوشتەپە لە ژووێکی داخراو ڕزگار کرا

ئاڤا نیوز

ئاڤا میدیا دوای 15 ساڵ کۆتایی بە چیرۆکی خەمناکی کچێکی تووشبوو بە ئۆتیزم هێنا، کە بەهۆی نەخۆشیی و هەژارییەوە لەناو ماڵەکەیدا بە زنجیر بەسترابوویەوە.

چیرۆکی سەرەکی: گەشبین کچێکی تەمەن 23 ساڵی دانیشتووی قەزای قوشتەپەیە، کە بەهۆی ئۆتیزمی توند و خراپیی باری دارایی خێزانەکەیەوە، ماوەی 15 ساڵ بوو بە زنجیر لە ناو ماڵدا بەسترابوویەوە. ڕزگار کۆچەر لەرێگەی بەرنامەی "بە ڕزگار بڵێ"وە سەردانی ئەم خێزانەی کرد و دۆخە کارەساتبارەکەی بۆ ڕای گشتیی گواستەوە. هەر زوو دوای پەخشی بەرنامەکە، خێرخوازان و سەنتەرێکی پسپۆڕی ئۆتیزم هاتنە سەر هێڵ و بەڵێنی چارەسەرکردنی تەواوەتییان دا، کە ئەمەش وایکرد دوای پتر لە دەیەیەک بۆ یەکەمجار زنجیر لە قاچەکانی ئەو کچە بکرێتەوە و بگوازرێتەوە بۆ ژینگەیەکی تەندروست.

لێدوانی فەرمی: دکتۆر محەممەد، خاوەنی ئەو سەنتەرەی چارەسەری گەشبینی گرتووەتە ئەستۆ بە ئاڤای ڕاگەیاند: ئەگەر خانەوادەکەی هاوکاریم بکەن، دەتوانم لە ماوەی تەنها 3 مانگدا دۆخی گەشبین ئاسایی بکەمەوە و لەو بارە دەروونییە خراپە ڕزگاری بکەم.

ئەوەی پێویستە بیزانیت:  بەرنامەی "بە ڕزگار بڵێ" لە ئاڤا میدیا، کار لەسەر دۆزینەوەی ئەو کەیسە مرۆییانە دەکات کە لە ناو کۆمەڵگەدا ون بوون و پێویستییان بە دەستی هاوکاریی خێرایە؛ ئەم بەرنامەیە تاوەکو ئێستا توانیویەتی چەندین کێشەی قورسی خێزانە کەمداماتەکان لەرێگەی دروستکردنی پردێک لەگەڵ خێرخوازاندا چارەسەر بکات.