زێدان و مالیکی: بە هەموو شێوەیەک دەستوەردانی دەرەکی ڕەت دەکەینەوە

ئاڤا نیوز

فایەق زێدان، سەرۆکی ئەنجوومەنی باڵای دادوەریی و نووری مالیکی، سەرۆکی هاوپەیمانیی دەوڵەتی یاسا، هەموو جۆرە دەستوەردانێکی دەرەکییان لە کاروباری عێراق ڕەتکردەوە.

ڕاگەیێنراوی فەرمی: نووسینگەی مالیکی لە ڕاگەیێنراوێکدا ئاشکرای کرد: لە دیدارەکەدا جەخت لەسەر پاراستنی ڕێڕەوی دیموکراتیی و یاسایی وڵات و بەهێزکردنی سەروەریی یاسا کرایەوە تاوەکو ڕێگریی لە هەر هەوڵێکی دەرەکیی بۆ دیاریکردنی چارەنووسی سیاسیی عێراق بگیریێت.

زانیاریی زیاتر: ئەم هەڵوێستە هاوبەشە وەک وەڵامێکی ڕاستەوخۆ بۆ لێدوانەکانی ئەم دواییەی دۆناڵد ترەمپ، سەرۆکی ئەمریکا دەبینرێت، کە تێیدا بە فەرمیی کاندیدبوونی نووری مالیکی بۆ پۆستی سەرۆکوەزیران ڕەتکردبووەوە.

ئەوەی پێویستە بیزانیت: مالیکی لەرێگەی ئەم دیدارەوە دەیەوێت بیسەلمێنێت کە هێشتا وەک کارەکتەرێکی سەرەکیی لە گۆڕەپانی سیاسییدا ماوەتەوە و پەنابردنی بۆ سەرۆکی باڵاترین دامەزراوەی دادوەریی، هەوڵێکە بۆ نیشاندانی ئەوەی کە پڕۆسەی پێکهێنانی حکومەت ڕێڕەوێکی دەستووریی ناوخۆییە و نابێت وڵاتانی بێگانە هێڵی سوور بۆ کاندیدەکان دابنێن.

باکگراوند: دۆناڵد ترەمپ هەفتەی ڕابردوو هۆشداریی دابوو کە ئەگەر نووری مالیکی ببێتەوە بە سەرۆکوەزیران، ئەوا ئەمریکا سەرجەم هاوکارییە دارایی و سەربازییەکانی بۆ عێراق دەبڕێت. مالیکی کە ئێستا کاندیدی سەرەکیی چوارچێوەی هەماهەنگییە، ئەم هەڵوێستەی واشنتن بە "بەزاندنی سەروەریی" دەبینێت و دەیەوێت لەرێگەی هاوپەیمانێتییە ناوخۆییەکانەوە ڕووبەڕووی ببێتەوە.