قەتەر بۆ ڕێگریی لە شەڕ نێوەندگیریی لە نێوان واشنتن و تاران دەکات

ئاڤا نیوز

ئەمیری قەتەر و سەرۆککۆماری ئێران لە پەیوەندییەکی تەلەفۆنییدا هەوڵەکانیان بۆ کەمکردنەوەی گرژییەکانی لەگەڵ واشنتن چڕ کردەوە تاوەکو ڕێگریی لە جەنگێکی وێرانکەر بگرن.

بڵاوکراوی فەرمی: ئاژانسی هەواڵی قەتەر ڕایگەیاند: شێخ تەمیم بن حەمەد ئال سانی، ئەمیری قەتەر، ڕۆژی پێنجشەممە، پەیوەندییەکی تەلەفۆنیی گرینگی لەگەڵ مەسعوود پزیشکیان، سەرۆک کۆماری ئێران ئەنجام دا و هەردوولا باسیان لە دوایین گۆڕانکارییە ناوچەییەکان کردووە، بەتایبەتی ئەو هەوڵانەی دەدرێن بۆ کەمکردنەوەی گرژییەکان و چەسپاندنی سەقامگیریی لە ڕۆژهەڵاتی ناوەڕاستدا.

زانیاریی زیاتر: ئەم جووڵە دیپلۆماسییە لە کاتێکدایە کە ئیدارەی ترەمپ هێزەکانی لە کەنداودا جێگیر کردووە و هۆشداریی توندی داوەتە تاران. مەسعوود پزیشکیان پێشتریش لەگەڵ سەرکردەکانی ئیمارات و سعوودیە گفتوگۆی ئەنجامدابوو تاوەکو پشتیوانیی ئەوان بۆ هێورکردنەوەی دۆخەکە بەدەستبهێنێت.

لەلایەکی دیکەوە: هاوكات لەگەڵ قەتەر، تورکیاش دەستی بە نێوەندگیریی کردووە و بڕیارە سبەی هەینی عەباس عێراقچی بۆ یەکلاکردنەوەی مەرجەکانی دانوستان سەردانی ئەنقەرە بکات تاوەکو ڕێڕەوێکی ئاشتییانە لەبری بژاردەی سەربازیی بدۆزنەوە و ڕێگریی لە هەر کارەساتێکی گەورەی ئەمنیی بگرن.