بەرپرسانی باڵای یەکێتی و پارتی لەسەر ئاستی ناوخۆ لەبارەی پێکهێنانی حکومەت کۆبوونەوە

ئاڤا نیوز

پارتی دیموکراتی کوردستان و یەکێتیی نیشتمانیی کوردستان لەسەر ئاستی باڵا کۆبوونەوەی ناوخۆی حیزبەکەیان کرد، هەردوولاش تەوەری سەرەکی کۆبوونەوەکەیان تاوتوێکردنی هەنگاوەكانی پێكهێنانی حكومەت و هەڵبژاردنی پەرلەمانی عێراق بووە.

چیرۆکی سەرەکی: ڕۆژی یەکشەممە مەكتەبی سیاسیی یەكێتی بە سەرپەرشتیی بافڵ تاڵەبانی كۆبووەوە، بەپێی زانیارییەكان لە كۆبوونەوەكەدا دوو تەوەر زۆرترین گفتوگۆیان لەسەر كراوە، ئەوانیش هەڵبژاردنی پەرلەمانی عێراق و پێكهێنانی كابینەی دەی حكومەتی كوردستان.

زانیاریی زیاتر: ئەمڕۆ دوو شەممە مەكتەبی سیاسیی پارتی كۆبووەوە. ئاڤا زانیویەتی باسیان لە دەستپێکردنەوەی دانیشتنەکانی پەرلەمانی کوردستان و پێکهێنانی کابینەی نوێ و  ئامادەکارییەکان بۆ هەڵبژاردنی پەرلەمانی عێراق  کردووە.

پەیوەست بەم بابەتەوە: ئەمە لە کاتێکدایە ڕۆژی شەممە سەرۆك مەسعود بارزانی و بافڵ تاڵەبانی لە پیرمام كۆبوونەوە، بەوردی باسیان لە پێكهێنانی كابینەی نوێی حكومەت كردووە.

زانیاریی تایبەت: ئاڤا زانیویەتی پارتی و یەكێتی گەیشتوونەتە لێكتێگەیشتنی تەواو بۆ پرسی پێكهێنانی حكومەت، چاوەڕوان دەكرێت لە ڕۆژانی داهاتوودا شاندی باڵای دانوستانکاری هەردوولا کۆبوونەوەیەک بکەن و بڕیار لەبارەی دەستپێكردنی دانیشتنی پەرلەمان بدرێت، ئەمەش وەك هەنگاوێكی گرنگ بۆ پێكهێنانی حکومەتی تازە.