پارتی و یەکێتی لەسەر ئاستی باڵا لە پیرمام کۆدەبنەوە

ئاڤا نیوز 

بڕیارە ئێوارەی ئەمڕۆ سێشمەممە لە پیرمام پارتی و یەکێتی لەسەر ئاستی باڵا کۆببنەوە و باس لە پرسی پێکهێنانی کابینەی نوێی حکومەت دەکەن. 

وێنە گەورەکە: پێکهێنانی کابینەی 10ی حکومەتی هەرێمی کوردستان لە نێوان پارتی و یەکێتی لە قۆناغی کۆتاییدایە، لەم هەفتەیە بۆ دووەمین جار لەسەر ئاستی باڵا کۆدەبنەوە.

زانیاریی تایبەت: سەرچاوەیەک لە پارتی دیموکراتی کوردستان بە ئاڤای ڕاگەیاند، بڕیارە ئێوارەی ئەمڕۆ لە پیرمام، بە سەرپەرشتیی سەرۆک مەسعود بارزانی و بە ئامادەبوونی نێچیرڤان بارزانی و مەسرور بارزانی، هەروەها بافڵ تاڵەبانی و قوباد تاڵەبانی، کۆبوونەوەکەیەک ئەنجام بدرێت.

زانیاریی زیاتر: ئاڤا زانیویەتی کۆبوونەوەکە لە بارەگای بارزانی دەبێت، پێکهێنانی کابینەی نوێی حکومەتی هەرێمی کوردستان دەخرێتە بەر باس، پێشبینی ئەوەش دەکرێت هەواڵی خۆش لەبارەی پێکهێنانی کابینەی دەیەم هەبێت، ئەمەش لە ئەنجامی دەستپێشخەرییەکەی سەرۆک بارزانی دێت، دوای ئەوەی سەرەتای ئەم هەفتەیە لەگەڵ بافڵ تاڵەبانی لە پیرمام کۆبووەوە.

زانیاریی ئاڤا: یەکێتی نیشتمانی کوردستان داوای پۆستی وەزیری ناوخۆ و یەکێک لە پۆستی سەرۆکایەتییەکانی کردووە. ئاڤا زانیویەتی، یەکێتی بە پارتی وتووە، ئەگەر ڕازی بن ئێمە ئامادەین لە بەیانییەوە کابینەی نوێی پێکبهێنین.

باکگراوند: ڕۆژی شەممە 2025-09-27 لە سەڵاحەددین، سەرۆک مەسعود بارزانی، پێشوازی لە بافڵ تاڵەبانی کردووە. لە دیداری نێوانیان باسی بارودۆخی سیاسی عێراق و ناوچەکە و پرۆسەی سیاسی لە هەرێمی کوردستان کراوە. هاوکات پرسی پێکهێنانی کابینەی نوێی حکومەتی هەرێمی کوردستان بەشێکی دیکەی بابەتی دیدارەکە بووە، لەماوەی دوو ڕۆژی ڕابردووشدا بەجیا مەکتەبی سیاسیی پارتی و یەکێتی بەجیا تاوتوێی دەرەنجامی کۆبوونەوەی نێوان سەرۆک بارزانی و بافڵ تاڵەبانی کرا.