تەرمە سووتاوەکەی لالەزار ڕادەستی کەسوکاری کرایەوە

ئاڤا نیوز

کەسوکاری ڕێکار عەبدولڕەزاق، تەرمە سووتاوەکەی هێرشی سەر لالەزار دەڵێن، "ئەمڕۆ تەرمەکەمان وەرگرتووەتەوە و بەخاکی دەسپێرن".

چیرۆکی سەرەکی: دوای تێپەڕبوونی نزیکەی سێ مانگ بەسەر ڕووداوەکەی لالەزار، چەند کەسێک کوژران و تەرمەکانیان سووتان، ڕۆژی دووشەممە، ناسنامەی یەکێک لە تەرمە سووتاوەکان لەلایەن پزیشکی دادی سلێمانی ئاشکراکرا، دەرکەوت تەرمی ڕێکار عەبدولڕەزاقی تەمەن 28 ساڵانە، کە نزیکەی سێ مانگە کەسوکاری ئەو گەنجە شوێن و بارەگا و بەرپرسی یەکێتی نەما بۆی نەچن، بەڵام وەڵامیان نەدرایەوە.

زانیاریی تایبەت: یەکێک لە کەسە نزیکەکانی ڕێکار عەبدولڕەزاق بەئاڤای گوت، "ئەمڕۆ تەرمەکەمان وەرگرتووەتەوە، هەر ئەمڕۆش لە گۆڕستانی سۆران بەخاکی دەسپێرین."

لێدوانی فەرمی: سلێمان موحسین، بەڕێوەبەری گشتیی ڕاگەیاندن و پەیوەندییەکان لە دەستەی سەربەخۆی مافی مرۆڤ، بەئاڤای گوت، "ئەوەی جێگەی گومان و ناڕەحەتییە، هێزە ئەمنییەکانی سلێمانی لە سەرەتاوە دەیانزانی تەرمی سووتاوەکە ڕێکارە، بەڵام بە کەسوکارەکەیان نەدەگوت."

گوتیشی، "بۆ دڵنیابوونەوە کەسوکارەکەی دەتوانن داوای لیژنەیەکی لێکۆلینەوە لە ئەنجوومەنی ئاسایشی هەرێمی کوردستان بکەن بۆ ئەوەی ڕاستی بابەتەکە بزانن."