چیرۆکی ڕفاندنی گەنجێکی چەمچەماڵ لەلایەن هێزەکانی یەکێتی

ئاڤا نیوز

 

گەنجێک بە ناوی بەشدار جەمال، تەمەن 21 ساڵ، ماوەی 24 ڕۆژە لەلایەن هێزێکی ئەمنیی یەکێتییەوە لە قەزای چەمچەماڵ "ڕفێنراوە" و تا ئێستا هیچ زانیارییەک لەبارەی چارەنووسییەوە نییە. خانەوادەکەی داوای ئاشکراکردنی چارەنووسی کوڕەکەیان دەکەن و دەڵێن، "دڵەڕاوکێیەکی زۆریان هەیە".

 

چیرۆکی سەرەکی؛ بەشدار جەمال لە کاتی کارکردنیدا لە کارگەیەک لە ناوچەی بازیان، لەلایەن هێزێکی ئەمنییەوە دەستگیر کراوە. جەمال کەریم، باوکی بەشدار، چیرۆکی ڕووداوەکەی بۆ ئاڤا گێڕایەوە و وتی: "نیوەڕۆیەک کە کوڕەکەم لە کار بووە، کەسێک تەلەفۆنی بۆ بەڕێوەبەری کارگەکە کردووە و پێیان وتووە کە کاریان بە بەشدارە. کاتێک بەڕێوەبەرەکە لەگەڵی چووەتە دەرەوە، هێزێک پەلاماریان داوە و ڕفاندوویانە."

 

باوکی بەشدار ئاماژەی بەوەش کرد کە ماوەی 24 ڕۆژە هیچ هەواڵێکیان لەسەر کوڕەکەیان نییە و نازانن لە چ دۆخێکدایە. "نازانین ماوە، مردووە، یان لە کوێیە. سەردانی هەموو لایەنە پەیوەندیدارەکانی یەکێتیمان کردووە، لە کۆمیتە و مەڵبەند، بەڵام بێسوود بووە و تەنها پێمان دەڵێن 'بەسەرچاو' ".

 

زانیاریی زیاتر؛ عائیشە سەعید، دایکی بەشدار، کە دایکی شەهیدێکیشە، بە گریانەوە باسی لەو ساتە کرد کە هەواڵی "ڕفاندنی" کوڕەکەی پێگەیشتووە. "نیوەڕۆ بوو تەلەفۆنێک هات و وتیان کوڕەکەتان ڕفێنراوە. کەس نازانێت بۆچی و لەسەر چی. من پێشتر کوڕێکم شەهید بووە و بەم کوڕەم دڵم ئۆقرەی گرتبوو، بەڵام ئێستا 24 ڕۆژە دووبارە جەرگم سووتاوە و هەموو ڕۆژێک لە ماڵەکەماندا شیوەنە."

 

ئەوەی پێویستە بیزانیت؛ دایکی بەشدار داواکارییەکی سادەی هەیە و بە ئاڤای گوت: "تەنها دەمەوێت بزانم کوڕەکەم لەسەر چی گیراوە و لە کوێیە. خێرتان دەگات ئەگەر تەنها هەواڵێکم پێبدەن. هیچ بەرپرسێکی یەکێتی نەماوە کە لە دەرگای نەدەین، بەڵام تا ئێستا کەس وەڵامێکی دڵخۆشکەری پێ نەداوین."