گەنجە دەستگیرکراوەکەی چەمچەماڵ هێشتا ئازاد نەکراوە

ئاڤا نیوز

نزیکەی مانگێکە گەنجێکی چەمچەماڵ لەلایەن ئاسایشی یەكێتییەوە دەستگیرکراوە و تاوەکو ئێستا ئازاد نەکراوە. ئاسایش بە کەس و کارەکەیان گوتووە دوو ڕۆژی دیکە ئازاد دەکرێت.

چیرۆکی سەرەکی: بەشدار جەمال، گەنجێکی دانیشتووی سنووری قەزای چەمچەماڵە، لە کارگەی چیمەنتۆی بازیان پاسەوان بووە 27 ڕۆژ پێش ئێستا لە کاتی ئەرکەکەی لەلایەن هێزێکی ئەمنیی حیزبی دەستگیرکراوە، لەکاتێکدا برایەکی شەهیدی یەکێتییە و دوو برای دیکەشی پێشمەرگەی هەمان حیزبن.

ئەوەی پێویستە بیزانیت: دوای 23 ڕۆژ لە دەستگیرکردنی ئەو گەنجە کەسوکارەکەی هیچ سۆراخێکیان نەدەزانی و سەردانی هەر شوێن و دەزگایەکی ئەمنیی سلێمانیان دەکرد، هیچ زانیاری و وەڵامێکیان لەسەر کوڕەکەیان پێنەدەدان. تا دوای ئەوەی ئاڤا میدیا بەدواداچوونی بۆ ئەو کەیسە کرد، ئینجا ئاسایشی سلێمانی بە خانەوادەی ئەو گەنجەیان ڕاگەیاند کە کوڕەکەیان لەلای ئەوان دەستگیرکراوە.

زانیاریی تایبەت: ئاڤا قسەی لەگەڵ دایکی بەشدار کرد، گوتی، "تاوەکو ئێستا کوڕەکەم ئازاد نەکراوە، نازانین کەی ئازادی دەکەن، قسەمان لەگەڵ ئاسایش کردووە، بە حسابی خۆیان دەڵێن ڕۆژی دووشەممە ئازادی دەکەن."