لە عێراق 40 کەس بەتۆمەتی "هەراسانکردنی ئەلیکترۆنیی و بێڕێزیکردن" دەستگیرکران

ئاڤا نیوز

دەزگای ئاسایشی نیشتیمانیی عێراق ڕایگەیاند، لە سێ مانگی ڕابردوودا هەڵمەتێکی فراوانیان ئەنجامداوە و بەهۆیەوە 40 کەسییان بەتۆمەتی "هەراسانکردنی ئەلیکترۆنیی و بێڕێزیکردن" دەستگیرکردووە.

ڕاگەیێنراوی فەرمی: دەزگای ئاسایشی نیشتیمانیی عێراق ڕایگەیاند، لە سێ مانگدا هەڵمەتێکی ئەمنیی فراوانیان ئەنجامداوە و بەهۆیەوە 40 کەس بەتۆمەتی هەراسانکردن و بێزارکردنی ئەلیکترۆنیی و بێڕێزیکردن لە 10 پارێزگای وڵاتدا دەستگیرکراون، هەڵمەتەکەش دوای ئاگادارکردنەوەی هاووڵاتیان بووە لەسەر کێشەکانیان و پەیوەندییان بە هێڵی گەرمی 131ەوە.

ئەوەشی خستووەتەڕوو، هاووڵاتییەکان باسیان لەوەکردووە کە کەسانێک هەراسانیان کردن بەوەی کە ئەگەر پارەیان بۆ نەنێرن بابەت و زانیاریی تایبەتییان لەبارەوە بڵاودەکرێتەوە، بەشێکی دیکەشیان وتوویانە بێڕێزییان پێکراوە، ئێستا سەرجەم تۆمەتبارەکان دۆسییەکانیان ئاڕاستەی دادگا کراوە.

گۆشەیەکی دیکەی دیمەنەکە: یەکێک لە دیارترین ئەو کەسانەی دەستگیرکراوە کەسێک بووە لە بەسڕە کە لە تۆڕە کۆمەڵایەتییەکان خاوەنی پەیجێک بووە بەناوی "ڕووبەڕووبوونەوەی هەراسانکردن" و بانگەشەی ئەوەی کردووە دەتوانێت مۆبایلیی ئەوانە هاک بکات کە هەراسانکەر بوون، کاتێک خەڵک پەیوەندیی پێوەکردووە داوای ئەو وێنە و ڤیدیۆ و زانیارییانەی کردووە کە لای کەسە هەراسانکەرەیە، کاتێکیش بابەتەکانیان بۆ ناردووە، ئەویش ئەوەی بەکارهێناوەتەوە و داوای پارەی کردووە، بۆیە لەکاتی وەرگرتنی پارە لە یەکێک لە قوربانییەکان دەستگیرکراوە.