ئامادەکاری بۆ کۆڕبەندی هاوبەشی نێوان وەبەرهێنەرانی کوردستان و ئیسپانیا دەکرێت

ئاڤا نیوز

بڕیارە مانگی نیسانی ساڵی داهاتوو، لە شاری مەدریدی ئیسپانیا کۆڕبەندی هاوبەشی نێوان وەبەرهێنەرانی هەرێمی کوردستان و ئیسپانیا دەکرێت و ئامادەکارییەکان دەستیپێکردووە.

وێنە گەورەکە: کۆمپانیا ئیسپانیەکان لە هەرێمی کوردستان خاوەنی چەندین پڕۆژەی گەورەی بازرگانی و پیشەسازی و کشتوکاڵین، لەسەر ئەو بنەمایە ئەم کۆڕبەندە بە ئامانجی ڕێککەوتن و لێکتێگەیشتنی نوێ لە نێوان وەبەرهێنەرانی هەرێمی کوردستان و ئیسپانیا دەکرێت.

لێدوانی فەرمی: بەرگەشت ئاکرەیی، وتەبێژی دەستەی وەبەرهێنان بە ئاڤا میدیای ڕاگەیاند، ئامادەکارییەکانمان دەستیپێکردووە لە مانگی نیسانی ساڵی داهاتوو ئەو کۆڕبەندە بەڕێوە دەچێت و تەنیا تایبەتە بە وەبەرهێنەرانی نێوان هەرێمی کوردستان و ئیسپانیا و وەبەرهێنەری هیچ وڵاتێکی دیکە بەشداری ناکات.

بەرگەشت ئاکرەیی دەشڵێت: نزیکەی 60 وەبەرهێنەری ناوخۆی هەرێمی کوردستان بەشداری کۆڕبەندەکە دەکەن. بڕیارە چەندین ڕێککەوتن و لێکتێگەیشتن لەبوارەکانی پیشەسازی و کشتوکاڵ واژۆ بکرێن.

لەلایەکی دیکەوە: ساڵی ڕابردوو بۆ ڕاکێشانی هێڵی شەمەندەفەر لە هەرێمی کوردستان کۆمپانیایەکی ئیسپانی پڕۆپۆزەڵی پێشکەشی دەستەی وەبەرهێنان کردبوو. بەرگەشت ئاکرەیی دەڵێت: دوای ئەوەی کۆمپانیاکە پڕۆپۆزەڵی پێشکەش کرد لەگەڵ وەزارەتەکانی پەیوەندیدار لە حکومەتی هەرێمی کوردستان هەڵسەنگاندن بۆ کوالێتی و تێچووی چۆنییەتی جێبەجێکردنی پڕۆژەکە دەکەین.