دزێک دووجار دزی لەماڵێک کردووە هەردووجار دەستگیراوە

ئاڤا نیوز

لە شاری کەرکووک دزێک لەماوەی ساڵێکدا بۆ جاری دووەم دزی لەماڵێک دەکات، هەردوو جارەکە دەستگیرکراوە.

چیرۆکی سەرەکی: لەشاری کەرکووک کەسێک دزی لە ماڵێک کردبوو و دوای دەستگیرکردن و وەرگرتنی سزاکەی، بە کەفالەت ئازاد دەکرێت، ڕۆژێک بەر لە دوایین دانیشتنی دادگا لەسەر دۆسیەی دزییەکەی یەکەمی، دووبارە و لەهەمان ئەو ماڵە بەهۆی دزیکردنەوە دەستگیرکرا کە ساڵی ڕابردوو دزی لێکردبوون.

لێدوانی فەرمی: سەرچاوەیەک لە پۆلیسی کەرکووک بە ئاڤای ڕاگەیاند: دزێک بە ناوی (ح، م، ف) لەدایکبووی ساڵی 2002، دانیشتووی گەڕەکی باروتخانەی شاری کەرکووکە، لە مانگی 11ـی ساڵی ڕابردوو کێبڵی کارەبا و سویچ پلاکی لە ماڵێکی گەڕەکی باروتخانە دزی بوو، دواتر دەستگیرکرا و دانی نا بە تاوانەکەی، بەهۆیەوە شەش مانگ لە گرتووخانە سزای وەرگرت و بە کەفالەت ئازاد کرا.

سەرچاوەکەی پۆلیس وتیشی: دادگا چەند دانیشتنێکی لەسەر دۆسیەکەی ئەنجامداوە، یەکشەممە 23-11-2025 وادەی دوایین دانیشتنی دادگا بوو لەسەر دۆسیەی دزییەکەی، کەچی بەرەبەیانی 22-11-2025 لەهەمان ماڵ و لەکاتی دووبارە دزینی کێبڵ، لەلایەن مەفرەزەیەکی بنکەی پۆلیسی ئازادییەوە دەستگیرکراوە، لەکاتی لێکۆڵینەوەشدا وتوویەتی (وەکو جەژنی لەدایکبوون ساڵانە یادی هەمان دزی دەکاتەوە).

زانیاریی زیاتر: بەپێی وتەی پۆلیس، سبەی لە دوایین دانیشتنی دادگا لەسەر دۆسیەی دزییە کۆنەکە، ڕووداوی دووبارەکردنەوەی دزییەکەی بەرامبەر هەمان ماڵ دەخرێتە سەر دۆسیەکەی و سزاکەشی قورستر دەبێت.