ڕاوێژکاری سوودانی: ناجێگیریی بەهای دۆلار لە بازاڕی ئازاددا کاتییە

ئاڤا نیوز

ڕاوێژکاری سەرۆکوەزیرانی عێراق بۆ کاروباری دارایی ڕایدەگەیێنێت، ناجێگیریی بەهای دینار بەرامبەر بە دۆلار لە بازاڕی ئازاددا "کاتییە" و گوزارشت لە کێشەیەکی بنەڕەتی لە ئابووریی وڵاتدا ناکات. وتیشی ئەم پەرچەکردارەی بازاڕ دوای بڕیارەکانی حکومەت بۆ ڕێکخستنەوەی خەرجییە گشتییەکان و چاکسازیی لە سیستەمی باج و گومرگدا هاتووەتە ئاراوە.

لێدوانی فەرمی: مەزهەر محەممەد ساڵح، ڕاوێژکاری سەرۆکوەزیرانی عێراق بۆ کاروباری دارایی بۆ ئاژانسی فەرمی جەختی لەوە کردەوە کە ئەم بەزربوونەوە و نزمبوونەوەیە نابێتە هۆی گرانبوونی کاڵاکان، چونکە ئاستی هەڵاوسان لە عێراقدا لە خوار 2.5% ماوەتەوە.

بەگوتەی ساڵح سێ هۆکاری سەرەکی سەقامگیریی نرخەکانیان پاراستووە؛ یەکەمیان جێگیرکردنی بەهای فەرمی دۆلارە بە 1320 دینار، دووەمیان پاڵپشتیی دارایی حکومەتە کە نزیکەی 13%ـی کۆی بەرهەمی ناوخۆیی پێکدەهێنێت بۆ پاراستنی کاڵا بنەڕەتییەکان، سێیەمیشیان کاراکردنی "هایپەرمارکێتەکانە" وەک ڕکابەرێکی بەهێز بۆ جێگیرکردنی نرخەکان.

زانیاریی زیاتر: ڕاوێژکاری سەرۆکوەزیرانی عێراق بۆ کاروباری دارایی دەڵێت، بازاڕی ئازاد بە تەواوی لە ئاستی داهات و بەکاربردنی ڕۆژانەی خەڵک جیا بووەتەوە. ئێستا کاریگەریی ئەو بازاڕە تەنیا لە کڕین و فرۆشتنی موڵک و سەرمایە گەورەکاندا ماوەتەوە، کە ئەوانیش ڕاستەوخۆ پەیوەندییان بە سەقامگیریی ژیانی ڕۆژانەی هاووڵاتیان و دابینکردنی پێداویستییە سەرەکییەکانەوە نییە.