یەکێتی بەفەرمی ناوی کاندیدی خۆی بۆ پۆستی سەرۆککۆمار ئاشکرا دەکات

ئاڤا نیوز

بەر لە داخرانی دەرگای خۆپاڵاوتن بۆ پۆستی سەرۆککۆماری عێراق، یەکێتی نیشتمانی کوردستان کاندیدی خۆی بۆ ئەو پۆستە یەکلایی کردووەتەوە، ئەندامێکی سەرکردایەتی یەکێتی بە ئاڤای گوتووە، پێش کاتژمێر 1ـی دوانیوەڕۆی ئەمڕۆ کاندیدی سەرۆککۆمار ئاشکرا دەکەین. هاوکات ڕوون نییە پارتی کاندیدی بۆ ئەو پۆستە دەبێت یاخود نا.

چیرۆکی سەرەکی: ئەمڕۆ دووشەممە تا کاتژمێر 3:00ـی دوانیوەڕۆ، دوایین وادەی یاساییە بۆ پێشکەشکردنی مامەڵەکان بەمەبەستی وەرگرتنی پۆستی سەرۆککۆمار، تاوەکو ئێستا زیاتر لە 44 کەس خۆیان بۆ ئەو پۆستە کاندید کردووە، کە زۆربەیان یەکێتین یان کەسانی نزیک لەو حیزبەن.

زانیاریی تایبەت: ئەندامێکی سەرکردایەتی یەکێتی نیشتمانی کوردستان بە ئاڤای گوت، "پێش کاتژمێر 1ـی دوانیوەڕۆی ئەمڕۆ، ناوی کاندیدی خۆمان بۆ پۆستی سەرۆککۆماری عێراق ئاشکرا دەکەین."

لەلایەکی دیکەوە: شێروان دووبەردانی، ئەندامی فراکسیۆنی پارتی لە پەرلەمانی عێراق؛ سەبارەت بە هەبوونی کاندیدی پارتی ئەو پۆستە ئاماژەی بەوەدا، کە تاوەکو ئێستا هیچ ڕێنماییەکیان بۆ نەهاتووە و هیچ کاندیدێکی پارتی بۆ ئەو پۆستە پێشکەش نەکراوە.