حکومەتی عێراق دەنگۆی زیادکردنی نرخی بەنزین لە بودجەی 2026 ڕەت دەکاتەوە

ئاڤا نیوز

سەرچاوەیەکی بەرپرس لە حکومەتی عێراق ئەو هەواڵانەی ڕەت کردەوە کە باس لە زیادکردنی نرخی بەنزین دەکەن و دەڵێت، بژێوی هاووڵاتییان هێڵی سوورە.

زانیاریی بەدەستهاتوو: سەرچاوەیەکی حکومی بەرپرس بە میدیا عێراقییەکانی ڕاگەیاند، ئەو زانیارییانەی لە هەندێک پلاتفۆرم و تۆڕە کۆمەڵایەتییەکان سەبارەت بە بەرزکردنەوەی نرخی بەنزین بڵاوکراونەتەوە، گوایە نرخی لیترێک بەنزین لە 450 دینارەوە بۆ 750 دینار بەرز دەکرێتەوە و لە پڕۆژەیاسای بودجەی 2026 دیاری دەکرێت، دوورن لە ڕاستییەوە و هیچ بنەمایەکی فەرمییان نییە. ئاماژەی بەوەش کرد ئەم بابەتە لە گفتوگۆکانی ئامادەکردنی بودجەی ئەمساڵ نە لە دوور و نە لە نزیک باسی لێوە نەکراوە.

سەرچاوەکە، کە نەیویستووە ناوی ئاشکرا بکرێت، ڕوونی کردەوە، سیاسەتی دارایی حکومەت ڕەچاوی بارودۆخی ئابووری و بژێوی هاووڵاتییان دەکات و ڕژدە لەسەر ئەوەی هیچ بارگرانییەکی زێدە نەخاتە سەر ژیانی ڕۆژانەی خەڵک، بەتایبەت لە دابینکردنی پێداویستییە سەرەکییەکانی وەک سووتەمەنی.

زانیاریی زیاتر: بەگوتەی سەرچاوەکە، پڕۆژەیاسای بودجەی 2026 هێشتا لە قۆناغە تەکنیکییە سەرەتاییەکاندایە و بەپێی پێوەرە واقیعییەکان ئامادە دەکرێت، بە جۆرێک کە هاوسەنگی لە نێوان چاکسازیی دارایی و سەقامگیریی کۆمەڵایەتیدا دروست بکات. هەر بڕیارێکیش پەیوەندی بە نرخ یان پاڵپشتیی حکومییەوە هەبێت، تەنیا دوای لێکۆڵینەوەی ورد و لەپێناو بەرژەوەندیی گشتیدا دەدرێت.