دوو هەزار و 200 ئەفسەر و پلەداری پێشمەرگە مووچەی خانەنشینیان بۆ دەبەسترێت

ئاڤا نیوز

بەڕێوبەری گشتیی خانەنیشنی وەزارەتی پێشمەرگە ئاشكرای دەكات، دۆسیەی دوو هەزار و 200 ئەفسەر و پلەداری وەزارەتەكە، فەرمانی هەرێمییان بۆ دەرچووە و سەرجەم ڕێكارەكانیان تەواوكراون و ئەم مانگە مووچەیان بۆ دەبەسترێت.

ئەوەی پێویستە بیزانیت: مامەڵەی خانەنشینکردنی ئەفسەر و پلەدارانی پێشمەرگە لە مانگی ئۆكتۆبەری ساڵی ڕابردوو لە ئەنجوومەنی وەزیران تەواوكرا و ئاراستەی سەرۆکایەتی هەرێمی کوردستان کرا بەمەبەستی دەرچوونی فەرمانی هەرێمی بۆ خانەنشینبوونیان، ئێستاش لە وەزارەتی دارایی و ئابووری سەرجەم ڕێكارەكانیان تەواوكراوە.

لێدوانی فەرمی: لیوا حاجی مەلا ئەمین، بەڕێوبەری گشیی خانەنیشنی وەزارەتی پێشمەرگە، بە ئاڤای ڕاگەیاند، دۆسیەی ئەفسەر و پلەدارەکان كە ژمارەیان دوو هەزار و 200 کەسە، فەرمانی هەرێمییان بۆ دەرچووە، لە ڕۆژانی ڕابردوو مامەڵەی سەرجەمیان تەواو بووە و وەزیری پێشمەرگە واژۆی لەسەر دۆسیەکانیان کردووە، ئەم مانگە ناویان لە لیستی مووچە زیاد دەکرێت و مووچەیان بۆ دەبەسترێت.

زانیاریی زیاتر: ئەو ئەفسەر و پلەدارانە بەگوێرەی یاسای ژمارە 9ـی ساڵی 2014 خانەنشین دەکرێن، کەمترین مووچەی هەر یەكێكیان 500 هەزار دینار دەبێت.