280 کوژراو و بریندار لە پێکدادانەکانی حەزرەمەوتی یەمەن تۆمارکران

ئاڤا نیوز

لە ئەنجامی پێکدادانی سەختی نێوان هێزەکانی ئەنجوومەنی ئینتقالیی باشوور و هێزەکانی سەر بە حکومەت لە پارێزگای حەزرەمەوتی یەمەن، 280 کەس لە هەردوولا کوژران و بریندار بوون، ئەمەش دوای ئۆپەراسیۆنێکی بەرفراوانی هێزە حکومییەکان بۆ کۆنترۆڵکردنەوەی ناوچە ستراتیژییەکانی ڕۆژهەڵاتی وڵات.

چیرۆکی سەرەکی: هێزەکانی حکومەتی یەمەن، کە لەلایەن سعودییەوە پاڵپشتی دەکرێن، لە ڕۆژی هەینییەوە ئۆپەراسیۆنێکیان بۆ وەرگرتنەوەی پارێزگاکانی حەزرەمەوت و مەهرە دەستپێکردووە کە مانگی ڕابردوو لەلایەن هێزەکانی ئەنجوومەنی ڕاگوزەرەوە کۆنترۆڵ کرابوون.

لێدوانی فەرمی: بەرپرسێکی سەربازی لە هێزەکانی ئەنجوومەنی ڕاگوزەر بە ئاژانسی "فرانس پرێس"ـی ڕاگەیاندووە: "لە ڕۆژی هەینییەوە بەهۆی هێرشە ئاسمانییەکان و پێکدادانەکان لە ناوچەکانی خەشە، سەیئون و موکەلا، 80 چەکدارمان کوژراون و 152ـی دیکەش بریندار بوون." لە بەرامبەریشدا بەرپرسێکی حکومی ئاماژەی بەوە کردووە کە زیانەکانیان لەم پێکدادانانەدا گەیشتووەتە 14 کوژراو و 34 بریندار.

لەلایەکی دیکەوە: ڕەشاد عەلیمی، سەرۆکی ئەنجوومەنی سەرکردایەتیی سەرۆکایەتیی یەمەن، ئاشکرای کردووە، هێزەکانیان بەتەواوی پارێزگای حەزرەمەوتیان کۆنترۆڵ کردووەتەوە و دەستیان بەسەر بنکە سەربازییە سەرەکییەکانی شاری موکەلادا گرتووە، ئێستاش لە هەوڵی چەسپاندنی پێگەکانیانن.

ئەم پێکدادانە تووندانە لە کاتێکدایە کە گرژییەکانی نێوان سعوودیە و ئیمارات لەسەر دۆسیەی یەمەن ڕووی لە زیادبوون کردووە، چونکە هەردوو وڵات پاڵپشتی لە لایەنی جیاواز دەکەن لە ناو حکومەتی یەمەنی ناسێنراو بە نێودەوڵەتی. ئەم پەرەسەندنانەش دوای ئەوە دێن کە مانگی ڕابردوو هێزەکانی ئەنجوومەنی ڕاگوزەر توانیبوویان دەسەڵاتی خۆیان بەسەر حەزرەمەوتدا بسەپێنن، کە بە یەکێک لە ناوچە هەرە دەوڵەمەندەکان بە سامانی سرووشتی لە یەمەن دادەنرێت.