ڕاییکردنی مامەڵەی کرێکاران و خاوەنکارەکانی هەولێر ڕادەگیرێت

ئاڤا نیوز

بەڕێوەبەرایەتیی دەستەبەرى کۆمەڵایەتى کرێکارانی هەولێر، ئاگاداری کرێکاران و خاوەنکاران دەکاتەوە بۆ ماوەی هەفتەیەک ڕاییکردنی مامەڵەکان ڕادەگیرێت و سەردانی بەڕێوەبەرایەتییەکە نەکەن.

وێنە گەورەکە: لەماوەی کابینەی نۆیەمی حکومەتی هەرێمی کوردستان، دەستەبەری کۆمەڵایەتی بۆ زیاتر لە 145 هەزار کرێکار کراوە، ڕۆژ دوای ڕۆژ ژمارەی ئەو کرێکار و خاوەنکارانەی خۆیان دەستەبەر دەکەن زیاتر دەبن.

لێدوانی فەرمی: تەمەن شوان سابیر، بەڕێوەبەری دەستەبەری کۆمەڵایەتی هەولێر بە ئاڤای گوت، "بەمەبەستی ئەنجامدانی وردبینی و ڕێکخستنەوەی ساڵانەی کارەکانمان و ئامادەکاری بۆ ساڵی نوێ لە ئەمڕۆوە تاوەکو ڕێککەوتی 11-01-2026 ڕاییکردنی مامەڵەی کرێکاران و خاوەنکارەکان ڕادەگیرێت."

زانیاریی زیاتر: سەبارەت بەو کەسانەی کە بەر لە پشووی سەری ساڵ مامەڵەی وەرگرتنی کۆتایی ڕاژەیان کردووە و پارەکەیان وەرنەگرتووە، بەڕێوەبەری دەستەبەری کۆمەڵایەتی هەولێر جەختی لەوەکردەوە لە ئێستادا بۆ ئەوانیش خەرج ناکرێت و چاوەڕێی بڕیاری وەزارەتی دارایین بۆ خەرجکردن.

ئەمەش بزانە: لە زۆرینەی پارێزگا و ئیدارە سەربەخۆکانی هەرێمی کوردستان بەڕێوەبەرایەتیی دەستەبەری کۆمەڵایەتی هەیە، بەگوێرەی یاسای خانەنشینی و دەستەبەری کۆمەڵایەتی کارەکانیان دەکەن، کرێکار و خاوەنکاران دەستەبەر دەکەن.