ڕاگرتنی گازی ئێران و سەرما قەیرانی کارەبای لە عێراق قووڵتر کردەوە

ئاڤا نیوز

بەغدا و پارێزگاکانی عێراق ڕووبەڕووی قەیرانێکی نوێی کارەبا بوونەتەوە، ئەمەش دوای ئەوەی هەناردەی گازی ئێران بۆ وێستگەکانی بەرهەمهێنان وەستا و خواستی هاووڵاتیانیش لە وەرزی سەرمادا زیادی کرد.

وێنە گەورەکە: ساڵانە عێراق لە وەرزی زستان و هاویندا بەهۆی کۆنی ژێرخانی وزە و پشتبەستنی زۆر بە گازی هاوردەکراو، تووشی قەیرانی کارەبا دەبێتەوە کە کاریگەریی ڕاستەوخۆی لەسەر ژیانی ڕۆژانەی هاووڵاتییان و ئابووریی وڵاتەکە دەبێت.

وەزارەتی کارەبای عێراق هەوڵی چاککردنەوەی تۆڕەکان دەدات، بەڵام هاووڵاتیان بەدەست کەمیی کاتژمێرەکانی پێدانی کارەبا و گرانبوونی نرخی ئەمپێری مۆلیدە ئەهلییەکانەوە دەناڵێنن، ئەمەش بارگرانییەکی زۆری بۆ سەر شانی خێزانەکان دروست کردووە.

لێدوانی فەرمی: ئەحمەد مووسا، گوتەبێژی وەزارەتی کارەبا بە ڕۆژنامەی فەرمی ڕایگەیاند، هۆکاری سەرەکیی کەمبوونەوەی کارەبا بۆ بڕینی گازی ئێران و کاریگەریی کەشوهەوا لەسەر تۆڕەکان دەگەڕێتەوە. ئاماژەی بەوەش کرد، تیمە تەکنیکییەکان خەریکی چاککردنەوەی ئەو هێڵانەن کە بەهۆی بارانەوە زیانیان بەرکەوتووە، بەڵام گازی ناوخۆیی بەشی تەواوی پێداویستییەکان ناکات.

لەلایەکی دیکەوە: عەلی زرکانی، سەرۆکی لیژنەی نەوت و گاز لە ئەنجوومەنی پارێزگای بەغدا ئاشکرای کرد، کەمبوونەوەی بڕی سووتەمەنی بۆ مۆلیدەکان لە 40 لیترەوە بۆ 15 لیتر بۆ هەر "KV" ـێک، بووەتە هۆی بەرزبوونەوەی نرخ بۆ مانگی یەک.