تا ئێستا ڕێککەوتن بۆ دیاریکردنی کاندیدی سەرۆکوەزیران نەکراوە

ئاڤا نیوز

ئەنجوومەنی باڵای ئیسلامیی عێراق ڕایگەیاند، تاوەکو ئێستا هیچ ڕێککەوتنێکی کۆتایی لەنێوان لایەنەکانی نێو چوارچێوەی هەماهەنگی لەسەر دیاریکردنی کەسایەتیی سەرۆکوەزیرانی داهاتوو نییە.

وێنە گەورەکە: بەپێی ڕێککەوتنی عورفی سیاسی نێوان هێزە سیاسییەکانی عێراق، پۆستی سەرۆکوەزیرانی عێراق بۆ لایەنە شیعییەکانە، تا ئێستا ئەوانیش خۆیان یەکلانەکردووەتەوە لەسەر کاندیدێک بۆ ئەو پۆستە.

لێدوانی فەرمی: عەلی دیفاعی، وتەبێژی فەرمی، ئەنجوومەنی باڵای ئیسلامیی عێراق بە ڕۆژنامەی فەرمی ڕاگەیاند، ئەو زانیارییانەی لە هەندێک میدیا و پلاتفۆرمی سۆشیاڵ میدیا بڵاودەکرێنەوە، گوزارشت لە ڕاستی و ناوەڕۆکی ئەو گفتوگۆیانە ناکەن لە پشت پەردەکانەوە لەنێوان هێزە سیاسییەکاندا بەڕێوەدەچن.

دیفاعی جەختی کردەوە، کۆبوونەوەکانی چوارچێوەی هەماهەنگی بەشێوەیەکی خولی و بەبێ هیچ پچڕانێک بەردەوامن، ئامانجی ئەم دیدارانەش گەیشتنە بە سازانێکی نیشتمانی بۆ تاوتوێکردنی ئیستحقاقە دەستوورییەکان و ئەو بژاردانەی لەبەردەستیاندایە.

ئاماژەی بەوەشکرد، چوارچێوەی هەماهەنگی دوور لە هەر گوشارێکی دەرەکی یان پەلەکردن لە بڕیاردان، هەوڵدەدات کەسایەتییەک هەڵبژێرێت توانای بەڕێوەبردنی حکومەتی داهاتووی بەشێوەیەکی لێهاتووانە هەبێت و بتوانێت بەرەوڕووی ئاڵنگارییە ناوخۆییەکان ببێتەوە و سەقامگیریی سیاسی و ئابووریی بۆ وڵات بگەڕێنێتەوە.

زانیاریی زیاتر: بەپێی وتەکانی دیفاعی، یەکلاییکردنەوەی ئەم پۆستە تەنیا لە چوارچێوەی یاسایی و دەستووری و تێگەیشتنی گشتگیردا دەبێت، بەجۆرێک هیچ لایەنێکی سیاسی پەراوێز نەخرێت و یەکڕیزیی ماڵی شیعە پارێزراو بێت. چوارچێوەی هەماهەنگی هەوڵدەدات لە ڕێگەی ئەم گفتوگۆ قووڵانەوە متمانەی جەماوەر بە پڕۆسەی سیاسی نوێ بکاتەوە و حکومەتێکی بەهێز پێکبهێنێت و حکومەتەکە وەڵامدەرەوەی داواکارییەکانی هاووڵاتییان بێت.