سەرۆک بارزانی پشتیوانیی خۆی بۆ ئاشوورییەکان و هەموو پێکهاتەکانی دیکە دووپات دەکاتەوە

ئاڤا نیوز

سەرۆک بارزانی پێشوازی لە سەرۆکی دامەزراوەی ئاشوورییەکان لە پێناو دادوەری لە ئەمەریکا کرد، لە دیدارێکدا، پشتیوانیی خۆی بۆ ئاشوورییەکان و هەموو پێکهاتەکانی دیکە دووپاتکردەوە.

چیرۆکی سەرەکی: ئەمڕۆ دووشەممە 5-1-2026، سەرۆک مەسعود بارزانی لە پیرمام پێشوازی لە سام دەرمۆ، سەرۆکی دامەزراوەی ئاشوورییەکان لە پێناو دادوەری لە ئەمەریکا کرد، لە دیدارەکەدا بارودۆخی سیاسی عێراق و گۆڕانکارییەکانی ناوچەکە بە گشتی تاوتوێکرا.

ڕاگەیێنراوی فەرمی: بارەگای بارزانی بڵاوی کردەوە، لە دیدارەکە سەرۆک بارزانی پشتیوانیی خۆی بۆ ئاشوورییەکان و هەموو پێکهاتەکانی دیکە دووپاتکردەوە و ئاماژەی بەوەدا، لە سەردەمی شێخ عەبدولسەلام بارزانی و شێخ ئەحمەد بارزانی گرنگی بە پاراستنی یەکسانی و دادپەروەریی مافی نەتەوە و ئایینە جیاوازەکانی کوردستان دراوە.

سام دەرمۆ، ستایشی ڕۆڵی سەرۆک بارزانی کرد لە پاڵپشتیکردنی بەردەوامیان بۆ پێکهاتە ئایینی و نەتەوەییەکان، هەروەها سوپاسی پشتگیری سەرۆک بارزانی کرد لە کردنەوەی مۆنۆمێنتی یادەوەری شەهیدی ئاشووری کە دوێنێ بەردی بناغەی بۆ دانرا، ئەم پڕۆژەیەشی بە دەستکەوتێکی مێژوویی ناوزەد کرد.