عەسائیب نکووڵیی لەوە دەکات بەیاننامەیان بۆ چەک دانان هەبووبێت

ئاڤا نیوز

 

عەسائیب بێبەریبوونی خۆی ڕاگەیاند لە بەیاننامەی "ڕەتکردنەوەی دانانی چەک" ی گروپە چەکدارەکان، ئەوەش لەکاتێکدایە فشارە ناوخۆیی و نێو دەوڵەتییەکان بەردەوامن بۆ داماڵینی چەک لە گرووپە چەکدارەکانی عێراق و هەندێک گرووپی چەکداری حەشدی شەعبی ئامادەیی خۆیان پیشانداوە بۆ دەستبەرداربوون لە چەک.

 

چیرۆکی سەرەکی: بزووتنەوەی عەسائیبی ئەهلی حەق بە فەرمی ڕەتیکردەوە پەیوەندی بە بەیاننامەکەی "هەماهەنگی مقاومە"وە هەبێت، کە تێیدا جەخت لە مانەوەی چەک و دەرکردنی هێزە بیانییەکان کرابووەوە.

 

لێدوانی فەرمی: سەند حەمەدانی، وتەبێژی عەسائیبی ئەهلی حەق لە پۆستێکی تۆڕی کۆمەڵایەتی (X) نووسیویەتی: "نکوڵی دەکەین لە هەبوونی هەر پەیوەندییەکمان بە ناوەڕۆکی دواین بەیاننامە کە بە ناوی دەستەی (هەماهەنگی مقاوەمە)ی عێراقییەوە دەرچووە."

 

زانیاری زیاتر: دوێنێ یەکشەممە، بەیاننامەیەک بە ناوی "هەماهەنگی مقاوەمە" (کە گروپەکانی وەک نوجەبا، کەتائیبی حزبوڵا و سەیدولشوهەدا لەخۆدەگرێت) بڵاوکرایەوە و چەکی مقاومەی بە "پیرۆز" ناوبردبوو و ڕەتیکردبووەوە تا کاتی چوونەدەرەوەی ئەمریکییەکان گفتوگۆ لەسەر دانانی چەک بکەن.

 

باکگراوند: عەسائیبی ئەهلی حەق، گرووپێکی چەکداری حەشدی شەعبییە و قەیس خەزعەلی، ئەمینداری گشتیی گرووپەکەیە و لە ساڵی 2020 ەوە  بەتۆمەتی "ئەنجامدانی تیرۆر و تووندوتیژی و کارکردن بۆ ئێران" خراوەتە لیستی تیرۆری ئەمریکا.